「沿途有禮」桌上遊戲巡迴展覽開展儀式

有幸可以參與「沿途有禮」桌上遊戲巡迴展覽開展儀式，非常感謝樂在棋中社會企業及MTR嘅邀請呀~

其實我對「沿途有禮」嘅認識都係由香港禮品及贈品展2015開始，因為小小豬係地鐵控關係，所以我對依套桌上遊戲非常有印象。今日有機會嚟參與展覽開展儀式，咁就可以對遊戲更加了解呀~

其實依個展區唔算太大，係德福廣場第二期商務嘅對面，不過佈置上都已經好吸引，因為場內都會地播放卡通動畫同設置一啲可愛小遊戲~

其實依啲設施都係想解釋背後嘅意義，就係從小培養乘客安全有禮的行為~

坦白講，最吸引我就一定係依一套「沿途有禮」桌上遊戲啦~

巡迴展覽開展儀式開始時，首先就由港鐵負責人向我地簡單介紹~

之後就由港鐵的卡通人物「基哥」嘅真人版港鐵營運主管李聖基先生同大家講下搭港鐵時嘅安全提示，「基哥」同真人版又真係幾似哦~

簡單嘅亮燈儀式，巡迴展覽就開始啦~

「沿途有禮」其實係樂在棋中出版眾多桌上遊戲中，奪得「香港智營禮品設計大賞2015」優異獎。所以遊戲負責設計嘅李芷晴同學及許維嬋同學同我地分享設計依套遊戲嘅點滴~

佢地都希望可以透過遊戲，可令乘客多留意平常不以為然的行為，加強鐵路安全禮讓好行為嘅意識，大家都可以做個有禮乘客呀！

最後大會向嘉賓致送紀念品同影大合照~

儀式過後，一班小朋友係度玩「沿途有禮」桌上遊戲，見佢地不時哈哈大笑，令我都好想玩埋一份呀~

係5月23日至25日嘅下午十二時三十分至晚上七時三十分都會有導師到場教導在場小朋友試玩「沿途有禮」遊戲，到時如果時間就到的話，一定要帶小小豬嚟玩一轉，相信佢一定開心都傻左呀~

不過如果依三日都已經安排左節目都唔緊要，因為5月26日至31日將移師到 PopCorn展出，最後係6月1日至7日係杏花新城(東翼)展出，有興趣想了解多啲「沿途有禮」遊戲嘅朋友仔就唔好錯過啦~

依家係樂在棋中社會企業的網頁上可以優惠價 $198 (原價$368) 預訂「《沿途有禮》桌上遊戲」，只限500套，售完即止，真係要快快手入手先得啦~

初次認識「沿途有禮」我已經好有興趣，今次睇埋更詳盡介紹，真係超級想買套返屋企。既可以滿足地鐵控小小豬之外，玩棋類活動又係一個好好嘅親子活動，以生活化遊戲亦可以容易加深學習，以遊戲中愉快學習係我最愛啦！