賢臣應為一面鏡（陳假）

鄭重聲明：

1. 進諫前題係要有 point，如果你係又鬧唔係又鬧到時俾人打唔好賴我

2. 此文無需對號入座，能夠令你諗到自己身處竟況都不妨思考一下

3. 網友 Siva Yan: 完善制度比人治重要

傳說中有個無敵盛世叫“貞觀之治”，無論文治武功都係空前成功。

貞觀之治之所以成功除咗係唐太宗李世民本身被傳為英明神武之外，仲有就係李生身邊有一班賢臣，其中一位為人所津津樂道嘅就係諫官魏徵。

之所以叫諫官就因為條友經常頂撞佢老世阿李生。例如有次李生見唔夠兵用，佢就聽宰相封德彝講打算徵未夠秤參軍嘅男丁入伍，當命令落到魏徵部門果陣魏徵死都唔簽字（監察制度幾重要呢）。當時李生怒x ：“朕意已決，事與汝何幹？”（註：我話咗咁就咁，關你差事）

魏徵回道：“竭澤而漁，明年無魚；焚林而獵，明年無獸。中男充軍，租賦雜徭下降，更何況兵不貴多而貴精，毋須湊數。” （註：夠秤嘅去咗當兵咪要啲未夠秤嘅做野交稅，未夠秤都當埋兵咪無收入囉， 更何況兵貴精不貴多，洗鬼跑數咩柒頭 ）

李生諗諗下又覺得真係柒咗，於是下令叫人停止收兵，仲醒咗個金甕俾魏徵（唔好問我幾大個）。

由於時間關係，後來魏徵瓜咗，李生覺得極度傷心，稱自己失去一面鏡。

我個人認為歷史有好多野都俾人修改過，尤其係依啲講到咁神嘅故事都唔知有幾多係水分，不過依個故事就好教育意義。作為一個賢能嘅參與者，面對領袖嘅時候應該好似一面鏡咁，好嘅壞嘅都要反映俾你地嘅領袖知道，應該敢言進諫（或有技巧地進諫喇），而唔係一味盲目跟隨支持，因為領袖都係人，佢地唔會做咩都啱。如果一個參與者只係盲目支持覺得領袖講咩都啱嘅其實變相做咗個擦鞋仔（我知無心嘅），輕則令領袖不斷自我感覺良好，重則會國破家亡。

不過賢臣就要遇到一個廣開言路、接受意見行動亦會改變嘅明君先會有用，如為領袖者屢勸不善或甚至為一言堂，作為賢臣嘅就要考慮“良禽擇木而棲，賢臣擇主而侍"，唔好以為依啲叫反骨。

當年衛靈公問孔子點樣行軍布陣，孔子即刻回答：“俎豆之事，則嘗聞之矣；軍旅之事未嘗學也。(注：祭祀禮儀我就識，打杖我識條鐡咩)” 。之後孔子就叫啲學生離開衛國。學生唔知點解，於是孔子解曰：“鳥擇木，無木擇鳥。”，即係覺得衞靈公柒，唔識知人善任亂Q咁嚟，唔會係個明君囉，咪以為孔子只係識教書，佢係有啲料到嘅。後來句野演變成 “良禽擇木而棲，賢臣擇主而侍"。

對於行政失當嘅領袖係要與以懲罰，如果無懲罰領袖者只會自以為是難以改進，而賢臣離開就係對領袖者一大懲罰，其實我地一直追求民主其中一個大原因都係想有個機制去懲罰行政失當者啫 。

當然除咗離開，都仲希望可以有其他有效方法令屢勸無效嘅領導者覺悟喇 ，更加希望有高人指教 。 （今次無搵過有無同人撞文，如有雷同請見諒，尤其是寫歷史故事的高手們）

作者：陳假（本文章由聚言時報授權提供）