【自家製】櫻花雙色奶凍

早前係FACEBOOK見好多朋友仔都去左日本睇櫻花，攪到我都勁想去現場睇呀！不過去就一定冇我份住，所以就整個櫻花甜品嚟止下癮先。

我依個櫻花雙色奶凍靚唔靚呢~

我識得用櫻花嚟做甜品，都係睇FACEBOOK向群組啲勁人偷師。佢地原本係用櫻花嚟做凍餅嘅，我就冇佢地咁叻，所以就簡簡單單咁用嚟整奶凍啦！

其實整依個奶凍都真係好容易，只係需要分三層次嚟整，所以時間就用左少少啦~

櫻花漬我搵左好耐先係CITYSUPER買到~

首先用凍水浸洗櫻花漬3-4次，沖走鹽份備用~

開始整第一層士多啤梨奶凍！

首先用凍水浸軟兩片魚膠片(魚膠片每片2.5g)~

然後將一盒236ml嘅士多啤梨奶用細火煮熱，加入2片浸軟嘅魚膠粉及2茶匙糖(糖可以因應個人口味加減的哦)~

之後攪拌至魚膠粉及糖完全溶解~

放涼後就可以倒入杯，再放入雪櫃至凝固~

士多啤梨奶凍凝固後，就可以整第二層鮮奶凍啦！

其實做法同士多啤梨奶凍完全一樣，都係先煮熱鮮奶，然後再加入魚膠粉及糖，再倒入杯，再放入雪櫃至凝固~

待第二層奶凍都凝固後，就可以準備整最後一層啦！

不過係依個步驟開始前，就可以將啲櫻花慢慢放入已凝固嘅奶凍上~

其實依一個步驟就同平日整啫喱一樣，先用一碗熱水加入荔枝啫喱粉，攪拌至完全溶解後再加入一碗凍水~

最後將啫喱慢慢倒入奶凍上~

放入雪櫃至凝固就可以食得啦！

可能係我自己整關係，所以我覺得真係好靚，有少少唔捨得整爛啲櫻花呀~

哈哈哈...小小豬都話啲花花好靚呀~

由於需要雪三個步驟，比例上雪嘅時間係長左啲啲，不過估唔到個質感都仍然唔錯，都非常好滑滑~

平日唔愛甜品嘅大肥豬都讚好食，仲話下次可以再整過俾佢食。一聽到佢讚都真係好有滿足感呢，因為佢真係好少..好少..好少讚我啲甜品呀！

哈哈哈...唔好問我啲櫻花好唔好食，因為面層嘅荔枝啫喱味道都比較濃，所以都蓋過左櫻花味。等我下次再用櫻花整其他甜品時，再試清楚個櫻花味啦！

不過....其實櫻花係咩味呢? 真係唔知哦...哈哈哈！