【自家製】果皮清蒸鮑魚仔

今日買去買海蝦時，見到啲平、靚、正嘅鮑魚仔，大大粒都係$150一斤，就係咁我地就加餸整左依個果皮清蒸鮑魚仔啦~

 買齊材料，可以開工啦~

哈哈哈...啲飽魚仔真係好大隻呀~

果皮浸透去囊，然後切絲。薑切絲備用~

先將鮑魚去內臟再用牙刷清洗乾淨，依個工序可以話係最辛苦因為每一隻都要擦擦擦，擦的乾乾淨淨先得呀~

記得連埋個殼都要洗，因為洗乾淨之後，放返粒鮑魚落去一齊蒸~

之後將果皮及薑絲放上鮑魚面上~

待水滾下蒸鍋隔水蒸五分鐘~

另一邊就開始煮個熟豉油，先用油爆香啲芫茜，之後加啲蒸魚豉油煮滾~

蒸好鮑魚仔，再倒入熟豉油，一碟好味嘅果皮清蒸鮑魚仔就出爐啦~

啲鮑魚勁鮮甜嫩口，啖啖肉之外再加上埋個熟豉油，真係絕配呀！

簡簡單單嘅煮法就可以煮到一碟大家都讚好味嘅餸，又可以等我扮下大廚啦，真係好有自豪感呀！