愛心芝士肉醬意粉

小小豬專登為我做左一個午餐，真係一個充滿愛心嘅芝士肉醬意粉，未食都已經覺得心到甜啦~

對於我嚟講，小小豬做小廚師絕對唔係一件奇怪事，因為我成日都同佢嚟親子廚房。奇就奇在今次竟然係佢主動提出話想煮嘢俾我食，佢話就嚟係母親節，所以要做個小廚師，煮個好味嘅食物俾我食。

我估可能係學校老師開始教緊母親節，所以小小豬識得咁做，但其實唔理佢點解要做小廚師，佢有依個心思，我都要俾個叻叻佢呀！

傻傻的豬仔係我啲烹飪書揀左一個芝士肉醬意粉，仲話要即刻去街市買餸去煮意粉呀！

既然佢咁主動又熱情，我當然係非常樂意陪佢做依件事，所以就去買材料啦~

首先用少少雞粉、老抽、糖、生粉及水醃啲豬肉先~

小小豬話要先再睇多一次個食譜，唔好煮錯哦，真係好似幾有文有路哦~

將啲意粉出水先~

洗乾淨啲蕃茄~

然後將蕃茄切開細細粒~

放入攪拌機將蕃茄打至蕃茄蓉~

半粒洋蔥需要切成粒粒，原本我打算幫小小豬切洋蔥，因為我怕會令佢眼睛唔舒服。點知傻豬仔堅持要自己切，為免打消佢啲自信心，所以我就俾佢切幾下，其他嗰啲我就借啲異叫佢做其他嘢，快快手幫佢整埋啦~

材料準備好晒，就可以炒個醬汁啦！小小豬話佢唔識開火，所以就請我幫忙。不過依隻豬仔全程好似老師上身咁，每一個步驟都要我跟足佢指示呀！

首先燒紅鑊爆香洋蔥，之後加入豬肉碎炒勻~

之後加入蕃茄蓉~

最後加入少少生粉水埋個芡汁~

汁煮好之後就準備最後焗嘅環節，首先將已出水嘅意大利粉放入焗盤內~

加入蕃茄肉醬汁~

加入芝士~

睇下小小豬見到個半製成品個燦爛笑容，可想而知佢係有幾開心啦~

最後放入光波爐，250度焗8分鐘~

一碟滿愛心嘅芝士肉醬意粉出爐啦~

一個小小焗盤就足夠我地兩母子午餐份量，其實唔洗我講，單看小小豬個為食樣就知有幾好味啦~

雖然依個意粉唔係小小豬一手一腳咁整俾我食，對一個四歲多的小朋友實在唔可以有太大要求。不過今次係佢第一次咁主動要求煮嘢俾我食，由揀煮咩到煮嘅時候，佢都非常認真地參與，就係佢依一份心意，又教我如何不心甜呢！