Janice Man國內拍劇密賺人仔 股神教路股票賺百萬

Janice Man (文詠珊)去年加盟太陽娛樂文化後，工作量激增，除狂接廣告外，更被吳奇隆睇中，找她演出投資近1.5億人民幣的大型武俠劇「蜀山戰紀之劍俠傳奇」，與在國內人氣急升的陳偉霆做螢幕情侶。

該劇昨晚(13日)在橫店舉行大型記者招待會，全劇演員包括JM、吳奇隆、陳偉霆、趙麗穎、賈曉晨（JJ）等均有出席，吸引過百傳媒到場採訪外，現場亦有近千名粉絲撐場，場面墟冚。

JM及一眾演員以Catwalk形式出場，現場亦首次播出近4分鐘的片花。在片段中所有演員幾乎由頭打到尾，首次拍古裝武俠劇的JM為求效果，危險動作也親身上陣，搞到全身傷痕累累，晚晚要搽藥酒去瘀消腫。

轉會後積極進軍內地的JM，連拍兩劇密賺人仔，去年開始投資入市的她，近日因股票急升而賺近百萬，JM說：「原本舊年想買樓，但真係忙到無時間睇樓，朋友建議我啲錢唔好放係度，免得貶值，就叫我試下投資股票。舊年開始朋友叫我買最穩陣嘅港交所，因為我成日唔係香港無時間日日睇住個市，呢類股最啱。當時係$125入市，呢兩日見到升到$300就即刻遙距沽貨，都賺咗差唔多七位數！」至於會否再乘勝追擊，她說：「而家個價位咁高，真係要睇定啲再算啦。」