【懷舊合金】POPY ST《太空保衛團》金毛獅王

金毛獅王只係我地慣性既稱呼,有睇過卡通既,一定知佢既原名 ~ 太空保衛團。超合金魂福祿壽當中, 2011年既GX-59未來合體未再版時,天價令人卻步,男人既浪漫唯有燒腩飯,但當去年GX-59再版後,每一個男人浪漫夢都得以完夢。

當夢追完,我地又有空間回味吓金毛獅王...未來合體...太空保衛團既舊作。呢款同樣由POPY生產既ST GA-99,1979年時據聞售價係HK$20,今時今日如果個盒靚啲,應該要60倍售價或以上!

收藏品中,原來我都有兩隻,一隻靚仔,一隻無手缺件兼變色,但冇所謂啦,話晒都過咗成35年,鍾意就好了! ST 可說是POPY DX Box Set 系列既簾價版,可玩花臣自然無咁多,獨沽一味射嘢,雙拳雙腳和心口都有發射裝置,所以隻缺件貨射到唔見晒啲配件亦可以理解。

雖然唔可以做到超魂般三機合體變身,但個人覺得35年前既設計,外型上真係唔錯,不過千萬唔好因為背部搵唔到POPY資料就以為佢係老翻,呢隻合金商標資料係印係雙腿內側既。