【我不是型男】日賣200隻焗薯 ~ 7點嚟都無得食

我家附近的水渠道， 有一小店經常轉手， 印象中賣過韓國泡菜， 又賣過生煎包， 個多月前變了賣相很Raw， 水管喉管設計的薯仔店， 名叫「叁薯」(係米想襯返水渠道個名？)

「叁薯」由三名型男合作經營，我問阿Pan:「叁薯係咪即係你哋三個呀？？」，阿Pan回應:「唔係我哋呀！只係我哋用焗，煎，炸整嘅三款薯仔咋」(咁多係…形容你哋三個係型薯啦！！)

阿Pan與朋友4年前，於上環開設意大利咖啡店，期間有人收購，於是頂讓了給買家，賺了第一桶金。本來想再創業，但因為舖租太貴，於是便一等多年才再開店賣薯仔。

三位老闆之前曾共事一間意大利餐廳，創辦「叁薯」前，他們又想過賣海鮮，野雞，不過突然煮薯仔，發現效果理想，「因為圍內一班好鬼嘴饞嘅朋友，試食完都有讚無彈囉，所以好有信心」

意式餐廳大廚Chris在「叁薯」專責煮食，他與Pan每朝8時多便回舖頭準備，故此第一批30隻的「壹薯」，最早11時前便可以有得賣。

壹薯 (原隻焗美國薯仔配三種芝士，水牛，車打，酸忌廉芝士)，阿Pan說開業以來最多人買。(我都覺得好抵$28，好夠飽，焗咗兩個鐘，皮有少少實在，薯肉腍到入口即溶，食得好鬼滿足)

我問Pan如果焗三個鐘效果會如何？他答:「唔得架，舊薯仔會散架。(我以為會入口即化添)，反而無咁好食就真」原來，7時左右，「壹薯」通常會售罄，Pan無奈說:「地方太細，真係無辦法」

三位年青人覺得薯仔好襯太子區，不過原來尖沙嘴、屯門舖位亦有看過，但因為水渠道這裡上手又是賣小食，因利成便。(估計你哋應該可以打破這舖位做唔長的宿命啦！！)

小饅頭配意大利芝士忌廉，是唯一店內的甜品，我本來想買士多啤梨，但Pan問我:「你鍾意食甜定酸？如果甜就爆糖，有糖漿，士多啤梨會帶酸少少」

炸銀絲卷一向都是我和SY的最愛，阿Pan:「如果你好耐先食，我就將啲漿分開裝畀你，因為啲小饅頭一定要熱食，費事啲漿整腍晒啲饅頭啦」

其實，這款又脆又綿又帶甜的感覺非常正，愈食愈興奮似十足睇完杜德偉同小豬合唱信自己一樣。正爆！！

阿Pan說他最愛香口的貳薯~鴨肉薯餅，本來有燒鴨肉感覺不錯，但因為加入少少黑辣調味，阿囝吃不到，我又略嫌辣口…

叁薯則由三款薯制成薯片，美國薯片較脆口，配紫番薯帶甜，及本地薯仔較韌。(如果可以畀仁揀，我諗我只係要美國薯，始終盟塞的我認為食包要夠熱，薯片要夠脆先滿足)

薯片薯條怪的SY，一邊食，一邊被阿太阻止，說熱氣，(無有怕…我已為他準備了可樂解除熱氣)，SY:「飲爆炸，食薯片超級正！！」(可惜阿太最後搶了成罐來飲…)

傳媒報導型男Pan及 Chris，放學時間吸引大批女學生，Pan笑笑口瞪清:「麻甩佬點會型呀！我想街坊覺得我哋啲嘢好食，仲好過話我哋型啦...」(不過你兩個真係成個王宗堯咁樣喎…)

原來每日做足14小時，3個月做足92日的兩位型男，已經各有要好女友，(八卦佬問…你哋女友無投訴咩？) 「互相遷就啦...佢哋都好睇量我們剛剛創業麻，有共識嘅…」哦！.....咁各位女街坊…唯有只可以繼續食薯喇...