大鐵人18號試玩報告

老餅至愛當中，大鐵人兄弟所佔既位置肯定無比重要，當年17號既產品都算多，POPY合金不單17號本身，亦淨出飛行要塞版，三郎專機和鑽地車都出過，大膠有日版又有台版，美版Godaikin亦出過大盒裝，但細佬18號就好似一件都冇出過；而近廿年，就只出過笨大自動變身合金（十隻九隻爛既變身設計）,Zeem廠大膠，連埋套扭蛋，當中最多人談論既，可能係浪漫堂既17 & 18兄弟組裝式Figure。 或許18 號真係極少產品既關係，數埋都係得兩款：浪漫堂人偶和扭蛋，難怪浪漫堂人偶已成天價，最近有人用扭蛋造形翻成手辦都賣近千，可想而知老餅對18號既渴求程度，相信大家一直對笨大超合金魂系列都有期望，一直等佢出十五機，百獸王，大鐵人...，可惜，一直等唔到...！

今年卒之等到有廠商推出17 & 18號合金，真係開心到瞓唔著，期待又期待，今日有幸成為第一手試玩家，這個半完成品真的不錯。先講合金量，整體大致70%合金,PVC集中上身位置，如頭，肩和心口開關等，避免咗上重下輕，亦變相令下盤馬步更穩陣，擺咩姿勢都企得好穩固，整體拎上手都好墜手吓。

18號全身共有兩處著燈裝置，除眼部外，胸部和大哥17號同樣是終極絕招發射位置，但18不同17的原子能死光，不斷閃爍LED燈象徵發射中，而是一枝枝發射飛彈，可能要設計呢排彈射式飛彈確實有啲難度，故亦改為以LED燈加強效果，取其意義。換電位置放於頭部後方,都算係傳統既設計，不過燈掣開關設計稍嫌未盡善，眼部開關在天線位置，當處於“開”的狀態時，天線會出現左右長短的情況，而胸口燈開關則放肩膀位，據說這仍未是最終版本，設計師會就兩個開關作出改良。

(抱歉，手震咗)

關節設計方面，膊頭，手肘，膝蓋和盤骨位，都用咗類似百獸王之類的齒輪式關節，所以關節好實淨，擺姿勢冇甩拖，而下盤設計更為新穎，直立時關節位收起，擺放大開大合姿勢時可將關節位拉吓，紥個靚馬都仲得。

上色方面，今次18號總共有三隻色，原創黑色18號今日緣慳一面，銀色18號就俾人一種又新淨既感覺，至於電視原著生銹版都已經好貼近原著，不過仍有改善空間，據說設計師仍爭取時間，最後的上色形態仍會有微調，相信出街時會更靚更正。

今次18號買一送一，贈品係當年TV版和18號同歸於盡的武士機械人，雖然物料只係膠，但外形設計和上色都一絲不苟，出面有啲懷舊老翻膠公仔都賣成$600 - $700，而家免費送埋，到時加埋17號，經典名場面又呈現眼前。

和大家分享當年一件憾事，大約係1994至95年左右，某日放工落了銅鑼灣糖街逛商場，當晚某玩具店返了新玩具，當中包括大大盒要自己砌的浪漫堂大鐵人 17 和 18號，由於身上銀兩有限，心諗雖然兩個都鍾意，但二揀一梗係揀主角啦，於是買了哥哥17號回家，亦諗住過幾日再來帶埋細佬18號返去團聚，細佬仔唔識嘢，完全唔知18號係限量版，幾日後當然冇可能再買到，去開既舖頭亦唔見有，兄弟從此分離，呢一別足足十六年，2011年尾有人教我玩拍賣，卒之係Y拍用當年幾倍價錢買返細佬團聚完夢。

或者係呢個情意結，令我對18號既產品有種饑渴既慾望，當知道出18號合金後，真係好興奮，今時今日唔使再考慮咁多，三色各一，電視原版要多隻...！！！