銀白長髮為招牌look的潘源良，緃橫填詞界超過30年，即將6月在紅館舉行作品展，演出名單仍在賣關子，但作品展的主題曲《憑著愛》已率先曝光，潘sir欽點林一峰監製，林二汶和C AllStar重新演繹，日前拉隊錄音和拍攝MV，潘sir親自監場，讚一峰是「浪子歌手」!
潘sir又表示非常欣賞同場的C AllStar靚聲，4子表示感到光榮，當然亦不放過機會拉住潘sir要為作品展點唱，成員陳健安(安仔)說：「我最鍾意前輩林子祥既《最愛是誰》，好經典!」吳崇銘(King)就點唱林憶蓮《早晨》，他說：「我之前喺一個舞台劇演唱過呢首歌，以前聽就只係覺得首歌好悅耳，但了解歌詞後原來好入心入肺。」梁釗峰更稱：「潘sir寫畀陳奕迅既《越想越無謂》係我人生top 10歌曲之一!」他們越講越興奮，還一邊講一邊唱歌神張學友的《望月》、《偷閒加油站》、《怎麼捨得你》等，何建曦(Jase)就點唱陳奕迅的《抱擁這分鐘》!
今次他們齊齊走入錄音室，重新灌錄的廣東歌《憑著愛》，是潘sir在八十年代的填詞作品，由盧冠廷作曲，蘇芮主唱，歌詞勵志。林一峰身為2015年新版《憑著愛》的監製，重新編曲，錄音時還親身上陣示範，二汶和C AllStar跟著指示反覆以不同風格唱完又唱，潘sir監場後表示很滿意，揚言非常欣賞這6位年輕音樂人的態度和歌藝。一峰爆親妹妹二汶與《憑著愛》的淵源，他說：「呢首歌出現既時候，二汶只得幾歲，但成日喺屋企一邊同自己玩玩具一邊口噏噏唱『高高低低彎彎曲曲』。」二汶興奮附和：「係呀，因為首歌好多疊字，好順口，當時得幾歲既我就成日唱，長大後明白歌詞才發現原來咁有意思，估唔到有機會認真咁錄呢首歌!」潘sir笑說：「你依家先發現唔係兒歌!」一峰說：「呢首歌啲詞好正能量，仲可以為香港打打氣!」歌癮大發的二汶在旁哼著歌。
潘sir說：「我唔係一個鍾意懷舊既人，鍾意創作啲新嘢，所以今次搵埋一峰、二汶和C AllStar嚟，就係想要有新感覺，果然效果耳目一新!」他還為一峰添新封號，說：「人哋話我係『浪子詞人』，我就話一峰係『浪子歌手』!(一峰：嘩，我冇你咁有型喎!)喺一峰既音樂裏看到風景，加埋二汶把聲咁靚，佢哋兩兄妹感情又好好，啲歌反映時局和生命，我覺得佢哋就好似『The Carpenters』!」被潘sir讚與70年代紅爆全球的美國兄妹組合The Carpenters「木匠兄妹」相題並論，一峰和二汶感榮幸。二汶亦乘機點唱,她說：「幾年前我開咗個以『前度』為主題既音樂會，唱咗潘sir包辦作曲填詞既《男人是否都一樣》，唔知今次可唔可以請到原唱人卿姐(葉玉卿)?」潘sir笑說：「嘩，呢個難度唔止高高低低彎彎曲曲喎! 其實我真係請咗好多原唱者嚟重新演繹，有啲來自唔同地方，不過依家要賣吓關子先! 」
