飲紅酒飲到咁上下, 自然就想試下舊酒, 始終愈優質的紅酒, 陳年能力就愈高, 呢種魅力就引誘您要去㗳真下。
筆者年頭四十大壽, 好友簡生去年就從紐約帶了瓶1974年的Paolo Cordero di Montezemolo 的Barolo 送給我, 終於擁有支同自己一樣咁老的酒, 心情十分複雜, 就是又想飲, 又唔捨得開, 曾經放在酒櫃的深深處, 儘量唔好見住心思思啦, 但又得閒會攞出來睇下。嘻嘻! 卒之忍到今年生日, 開了這支40歲美酒和簡生及一班老死分享。
每次開舊酒, 總是戰戰兢兢, 又怕開爛木塞, 又怕支酒已變壞, 當開瓶器鑽入去總是feel到木塞軟綿綿, 拔木塞出來時係最緊張的一刻, 氣都唔敢透, 仲以為自己係妙手仁心吳啓華做緊手術。手術成功了, 慶幸今次1974的酒王, 依然有活力, 酸度靈活, 如果用其他酒來比喻的話, 就好似盛年而又複雜的 Pinot Noir, 當中更有玫瑰花香、草藥、少許田七、當歸的氣息。
Barolo被稱為意大利酒王, 其中原因, 無論新舊派, 年輕時總是很有力量, 果性濃厚集中, 單寧偏硬, 陳年能力長久。今次呢位40歲酒皇, 單寧已順和了, 斯斯文文, 沒有了皇帝的霸氣, 卻像穿了西裝結領呔的唐英年, 很溫文儒雅, 您會用六小時慢慢地了解佢的性格、變化、深度。
Paolo Cordero di Montezemolo呢個莊, 由Falletti family擁有, 去到第16代了。原屬傳統派別, 用長時間發酵和浸皮 (約2個月), 用大木桶, 所以陳年能力很高, 就像上述1974年一樣。為迎合市場需求, 係1980年代開始, 呢個酒莊帶領改革, 成為新派的先驅, 減短發酵和浸皮時間 (約14天), 使用細法國木桶, 令酒果味更突出, 單寧更順和, 較早可以享用。同期成為新派的, 還有 Renato Ratti 及 House of Ceretto。
至今, 新舊兩派各有擁護者, 但肯定的是新派做法令酒更容易氧化, 使陳年能力下降。如這樣演變下去, 相信將來會很難找到這些40歲的佳釀。
