【談港漫】金鐘罩奇功

細個睇港漫，武打仍以當時主流套路為主，虎鶴雙形，鐵沙掌，五形拳，梅花棍法...，以招拆招，賞心悅目，龍虎門當由香港十八區打到去日本羅殺教，即時升級，邪神火雲掌固然屈機，但最令人稱奇的，還是 ~ 金鐘罩奇功。

刀槍不入，水火不侵，但身上卻有一致命罩門...，呢個概念未必係黃玉郎首創，因為聽講當時好多港產武打片都有類似既硬功，罩門多數係下陰，所以又多數會戴返個護陰罩，而港漫歷史上，運用罩門呢條硬功橋亦不少，除金鐘罩外，舊著白蓮金聖老既金甲神功又係有罩門，即使神級港漫中華英雄，金太保既金甲元功又係有罩門。（諗諗吓，編劇有時都幾行貨，頂級硬功都係金XX，次啲就銅鐵XX。)

講起金鐘罩，大家或許諗起石黑龍，但人設上，似乎金羅漢更配。當時金羅漢呢個角色，除咗神人火雲邪神外，已近乎無敵。佢既金鐘罩師承至德和尚，而至德大難不死收咗亞柴為徒，舊著後期覆述石黑龍師傅係亞柴，其實錯晒，石黑龍係自學從囚室搵到至德本金鐘罩秘笈，學到第三關游水走人，浸爛咗本秘笈冇得學落去（呢鑊都真係傻仔)，而亞柴明知黑龍練到第三關，但有鑑於至德被金羅漢殺師既影響，一直不肯傳授，亞柴死前都後悔無收黑龍為徒。

金鐘罩經歷橫版直版和新著三個時代，但三個階段對於金鐘罩既設都好一致，無論關數，能力，以至罩門描述都好統一。石黑龍透過努力，加上濟遇，逐關逐關上，大家都好期待佢功成完關之日。

可惜，三個階段最終都被編劇弄跨。舊著龍虎門後期，石黑龍終於突破完關十二關，但當時所有高手都太高手，十二關等同爛鐵，唯有再上十三，十四，甚至十四關半，而且重點係唔使練，谷吓就得。如果舊著未完，相信石黑龍已經練到四十關。

外傳方面更加一塌糊塗，甚麼神道金鐘，攪到金鐘罩大平賣，幾乎連小販都識，又為攪而攪，甚麼凝氣成器，萬毒心經加金鐘罩，竟然可以煉條「啫啫」出來，達摩都激到翻生。

新傳最近又過於急進，冇辦法，托外傳編劇個福，外傳個個都係神級高手，新傳要有一致性就唯有跟，極其量話故事係外傳兩年前，稍稍推遲。但從編劇手法所見，肯定唔會慢慢來，君不見奇才西城勇外傳都話用咗近十年練到白級，而新傳西城仇（白仇）,以至棍妖小棍妖，都係兩三個月就練成白級，同樣地，不論是正宗金鐘罩，還是最近又出既變種金鐘罩，冇十關八關即係冇練過，金鐘罩奇功，最終又係衰收尾。