象仔燜燒杯@雪梨乾南北杏蜜棗茶

前幾日睇某個電視節目，教我地焗啲花果養生茶，其中有一款係對咳嗽好有幫助。依排轉天氣我啲咳都仲未清晒，所以就買啲材料，用象仔杯又試下整雪梨乾南北杏蜜棗茶啦~

材料只需要三樣加一隻象仔杯，我用左二片雪梨乾、少少南北杏及半粒蜜棗~

雪梨乾及南北杏略浸洗~

蜜棗浸軟及去核切絲(原食譜係用一整粒蜜棗，不過我怕太甜，所以只用半粒)~

將所所有材料放入象仔杯內，然後加水~

原本係話焗半小時，不過我諗住等佢出味啲，所以焗左差唔多一小時嗶~

飲得啦~

估唔到個味道又幾好飲，清清甜甜唔錯呀！飲完一杯之後，可以反覆沖泡飲至味精變淡為止。我用依個分量飲左一個上午，都可以話KEEP到四杯左右呀！

之前我都用過唔同材料嚟煲雪梨茶，每一次都係用新鮮嘅，雪梨乾都係第一次用。原來雪梨乾都係一樣可以潤肺、化痰、止渴，而且雪梨乾經過烤焗過程，所以就潤而不寒。

用雪梨乾嚟焗茶飲用，簡單少少材料及一隻保溫杯就得，真係既方便又簡單，非常啱各位靚靚上班一族，返工時飲水飲到悶可以焗杯嚟飲，好過成日飲啲唔健康嘅飲品嘛！