ET 三一龍開盒報告

無事真係少出街，今日行過肥趣，好似瀨咗迷魂黨嘢咁，無端端買咗盒磁石波返屋企 ： Evolution Toy 最新一隻磁石波產品 ~ No. 18 Getter Dragon。

呢隻嘢有讚有彈，雖然整體仍一如過往般單薄，拎上手輕飄飄，但過往彈到飛起既磁石波接位，好似有少少既改進，冇咁腳軟，而且雙膊連接上臂位置，加上一個入齒式關節，擺姿勢時實淨好多，值得一讚。另外，連招牌拗手型仔樣都得，但一排埋超魂嗰款，又略遜半籌。

三一萬能俠既玩家一直都有個夢想，就係實現動畫設定，三機互插可以變成不同機體，呢個夢想係約係十年前有廠半完成過，稱為半完成，只因雖然真係變到身合到體，但機體面目全非，要加啲想像力先認到佢係三一萬能俠。講到呢到，如果大家以為我跟住話呢隻ET做到咗，咁真係講你都唔好信啦。呢隻Getter Dragon可以透過唔同既Parts互換，“扮演“部份合體變身過程，叫做頂吓引先，距離真正合體變身，仍有一段好長既路。

要彈既，ET廠本身既QC控制仍有待改善，續上次鐵金剛中Sad後（有師兄指出，貼住QC貼紙位就係問題所在，但仍舊出貨），呢隻龍既大脾銀位又係花咗，而條腰位一扭，竟然甩咗，由於甩出來既連接位痴甩咗油，所以真係唔知佢係油漆未乾痴住，還是痴唔貼一扭就甩，要佢先知。