【小島有情】長洲情侶擋~拍擋賣手作

初五到長洲， 除了學人賞櫻之外， 我還去探探新認識的「島中坊研」情侶拍擋Amy 及 Stephen。

簡約的小店， 位於新興後街， 正正就在東堤小築29座斜對面， 在店門一直往右望便是長洲東灣， 風景靚到似日劇一樣。 (不過忘了影相， 大家有時間可以親身去感受一下。)

原來農曆新年才是長洲店舖的旺季， 所以小情侶新正頭也沒有休息， 今天年初五人流不絕。(真的不太好意思， 阻住人做生意。)

因為新正頭長洲實在太旺場關係， Amy正在補貨趕製布袋。 (她哈哈說笑...因為尋晚輸咗錢， 所以E家要加緊趕工喎！) 而Stephen就負責「Sell客」， 一凹一凸非常合拍的一對。

小朋友不停走來走去， 我真的怕新正頭會嚇怕小店的顧客， 於是打算告辭， Amy問：「沙灘的另一邊， 有一對情侶， 也是出售手作架喎， 你可以去睇吓！」(Yeah！ 正喎...於是我們就走去「賣藝」繼續呃水吹。)

島中坊研 Island Workbench

位於東灣路的「賣藝」很古色古香， 單單是那大宅式趟櫳門已經夠吸引。 「賣藝」是手作寄賣點， 與「島中坊研」一樣， 都是由一對小倩侶浪漫合營。

Adi於2010年， 澳洲墨爾砵Working Holiday認識女朋友Joy， 一年後兩人回港， 因為不太愛香港城市生活， 於是本來居於天水圍的Adi， 就搬入長洲生活，Adi:「因為覺得E度有啲似澳洲感覺！」。

原來「賣藝」前身是住家， 當年Adi對現址一見鍾情， 可惜當時剛剛租出，「不過幾個月後， 我發現上一手個店主想唔做， 於是我便第一時間接咗嚟租， 一直做到E家。」

原來開業當初， 不少長洲街坊都「撥冷水」話：「你賣E啲嘢， 好難做得長...」年半後的今日， Adi客氣道：「真係好好彩， 都係搏一舖， 好彩今時今日仲係度。」(咁即係門口跌到一地眼鏡碎啦！！)

店內放了數個好另類的Ukulele， Adi：「全部都係由一個住咗係長洲十年嘅美國人親手製作架！」

最奇型怪狀就是用一個雪茄盒改裝而成的Ukulele， 而用海螺做成的款式， 會不會用來睇安全一點呢？ (彈大力啲啲， 怕唔怕爛呢？)

一位醉心玻璃的香港人， 走到台灣學吹玻璃， 之後邀請師父一同開店賣玻璃。

Adi說：「佢差唔多留咗係台灣4年， 就係專心研究吹玻璃藝術。」 (嘩！ 我忽然諗到孫悟空陪師父取西經！！比我唔知捱唔捱到呢？？)

賢妻專區是Adi親手雕刻出來的， 他說：「E個係文青區， 所以我擺咗由英國手工木製的動物筆刨大軍出嚟。」(我懷疑塊木牌係佢送畀女友的暗示就真。)

我第一眼就看中這個90年代柯達的菲林型手提袋， Adi話：「喺個網站一發現， 就覺得好型， 即時買咗佢…不過你小心好多塵呀， 因為我放咗係度年半都未掂過， 古董嘢真係要夾有緣人先得嘅！！」

(SY:爸爸你咁鍾意唔買？ 我都想...不過千三蚊都係夾有緣人， 唔夾窮仁喇！)

未來兩年後， Adi同女友又將會到台灣發展， 我問：「到時舖頭點算呢？」 Adi：「E家要搵一個信得過嘅人， 到時就要靠佢幫手睇住E度喇！」

我經常覺得Working Holiday一定會去上癮。 (最衰政府攪Working Holiday時， 我都過咗30歲， 無緣享用， 我都不知幾想好似Adi咁， 避開幾年， Free爆！)

賣藝 myarts