轉季敏感嘅入嚟！#MIHK Bathe to Basic

美容

2021-04-13 |

1788

唔知有幾多人飽受轉季皮膚敏感之苦？我就係喇，唔知點解今年好似特別敏感添呀，隔幾日就呢度腫嗰到痕，搞到3月請咗好幾日病假，我覺得老細好似有啲炸型添...皮膚敏感嗰種慘真係不足為外人道，成晚痕，訓唔到，甚至係皮膚裂開痛，搽類固醇藥膏搽到啲皮膚硬到一忽忽，黑到一撻撻，嗰種辛苦，老細你明唔明啫，唔係我想射波唔返工扮病，而係真係好辛苦，由內在精神不振，到外在爛晒影響儀容呀！女人最痛算這種！塊面比身體我會更加注重咁用啲預防敏感嘅產品，尤其是係轉季呢段其間！香港天氣，用香港製造都好合理丫！介紹下Bathe to Basic呢個品牌，首先佢係100% MIHK，包裝簡約帶啲歐美風，連理念都同唔少歐美品牌相似－－注重天然材料、全人手小批製作、無動物測試。香港品牌做到呢個standard真心勁，值得大家去認識吓佢哋！

有機葵花籽潔面油 Basic Cleansing Oil（HKD 188）
我諗我都講過好多次，潔面油嘅好處係油可以帶走面上大部份污垢，仲可以好深層咁溶解毛孔入面嘅彩妝、防曬呢啲，有效潔淨、軟化、滋潤皮膚，所以無論你有冇化妝，護膚嘅first step一定一定唔好skip咗潔面油！用油唔等於出暗瘡㗎！由其是呢隻，佢哋冇用石油提煉礦物油，成份屬於全天然植物油：有機葵花籽、有機橄欖油、米糠油及蓖麻油成份，所以並唔會堵塞毛孔之餘，仲含有豐富脂肪酸，有助恢復皮膚天然pH值，天然紅沒藥醇，有助舒緩鎮靜肌膚添！

潔面油用法，最好就係乾手乾面，喺皮膚上面直接輕輕打圈，如果有化妝，會見到啲彩妝甩晒，好療癒㗎（哈哈～）講真，自從帶咗口罩後我就好少化妝，但防曬都一樣係用潔面油會卸得徹底啲。香味好天然，一路打圈個人已經覺得好relax。之後就加水乳化，我習慣加咗水之後打多幾個圈先洗走，用完皮膚靚晒，好柔軟，仲會散發自然嘅亮澤！

金盞花及桂花橄欖洗面液 Face Wash - Calendula & Osmanthus Infused（HKD 168）
呢支淨係聽個名已經覺得好舒服好香咁（笑）原來佢係春季限定橄欖洗面液！製作過程一啲都唔簡單，以金盞花&桂花浸泡於純橄欖油達3個月之久！我諗大家對金盞花都有啲認識，佢最出名嘅功效就有舒緩濕疹、降紅、止痕癢、抗敏、止痛、消炎等，敏感肌嘅朋友人生中一定唔多唔少都試過浸金盞花水架喇。至於桂花，佢含有豐富維他命B3，可以增強皮膚防禦能力，強效保濕！

點解用完潔面油仲要用潔面乳？潔面油係清潔皮膚同毛孔嘅污垢，而當呢啲油溶性嘅污垢清走之後，潔面乳就可以用嚟清潔皮膚老化角質死皮。等於洗頭會落兩次洗頭水，洗面一樣最好係兩個步驟都做齊。怕煩可以潔面油兩次或者潔面乳兩次咁（咁當然潔面油同潔面乳嘅功效同成份係有分別啦，兩者乳化嘅程度亦都唔同。）

精華化妝水 Basic Face Toner （HKD158）
Toner我都好鍾意！其實Toner都係清潔皮膚好重要嘅一環！濕啲Toner喺化妝棉上面再抹一抹皮膚，有時會見到啡啡地，呢啲就係啱啱潔面留低嘅角質喇！不過呢一支Toner就唔係淨係清潔咁簡單，佢仲係一支精華水嚟，可以幫助保濕加修護受損嘅皮膚。主要成份有有機蘋果醋、金縷梅精華、佛手柑精油、柑橘精油、洋甘菊精油、花梨木精油、六大重點天然成份，冇合成香味，香味天然，令人非常之舒服。

噴嘴噴嘅範圍都幾廣，一兩下夠晒全面，皮膚覺得好繃緊好痕嗰陣，可以噴兩吓，立即舒緩急救。我本身好鍾意佛手柑啲香味，用後皮膚係清爽嘅，感覺極之良好，打破防敏感嘅產品就痴笠笠嘅定律！

我啲皮膚真係非常敏感，可以係熱少少或者曬少少就紅曬，甚至有時出去做facial，按下面都會突然紅咗一忽。M到嘅日子敏感情到更加係倍增！用咗一排Bathe to Basics呢三寶，我覺得泛紅問題係有舒緩到，起碼，當我覺得皮膚唔多妥嗰陣，我會即刻噴一噴等我唔好去R塊面唔好再刺激佢。鼻翼呢啲成日都紅嘅位，而家已經冇咁紅，收斂咗，效果好好呀！