【新手爸爸】懷孕美好回憶要靠老公好好記錄

早前同大家分享咗一啲自己影嘅BB相，今日同大家講下媽咪懷孕照。是咁的，最近同囡囡影咗好多相，連同電話螢幕，whatsapp等都換哂囡囡相，搞到老婆投訴話自己無地位又無靚相。

其實我一早已經喺媽咪大肚時影落一堆相喇，除咗去影樓影一啲露出肚相，準爸爸都可以幫太太影下靚靚生活照，因為呢啲機會可能只得一次，最好好好記錄低老婆大肚時嘅moment呀。

我同咗老婆都有幾個地方影下相咁，好似維園同元朗圖書館，因為日光環境下加上花草樹木影出黎個感覺已經好清新。下午3、4點呢啲時間會比較好，因為無咁曬又有一定光線。而且最好在30周就影，因為如果去到臨生幾星期先影，老婆一定話好腫唔收貨，況且，接近分娩都唔好周圍走太操勞。

除咗影相仲有可以隔幾日影一張相拼埋做一條片，最後睇返都係幾感動，真係睇到老婆個肚一日一日大，感受到生命嘅奇妙。我而家有時都會諗咁大隻BB咁樣收得埋入媽咪個肚入邊呢？

我自己都有少少可惜嘅，因為我地之前打算去沙灘影下懷孕照，已經PLAN好哂日子去，但人算不如天算嗰日落大雨，中間又抽唔到時間，無幾耐老婆就入咗醫院等生BB喇。

所以話除咗有仔趁嫩生之外，影相都要有相趁早影呀。

Davis Papa

新手爸爸，育有一女，現職電視台導演及網路媒體創作人