福祿壽十周年澳門站演唱會完滿落幕 細細粒肥姐造型維肖維妙

王祖藍、阮兆祥、李思捷昨晚於澳門新濠影滙綜藝館，舉行福祿壽十周年澳門站演唱會。之前在香港站贏盡好評的福祿壽，去到澳門站依然未有鬆懈，加入大量全新及地道元素，務求令入場觀眾更有新鮮感。

之前盛傳秘密封盤訂婚的李思捷，甫開騷即遭兩位拍擋將緋聞擺上枱。祖藍先笑言若有現場觀眾認李思捷做老竇，李思捷會即場派錢，隨即惹來全場起哄，此時祖藍再寸嘴表示：「澳門人真係好不幸，因為佢哋連李思捷都要爭住認老竇，真係家門不幸喇。」之後祥師兄加入戰團，著思捷乘機在演唱會上就近日「封盤」傳聞解畫，李思捷馬上「離場」避談，雖然似是節目效果，但已成功炒熱氣氛。

是次演唱會繼續以集體回憶做主題，當中細細粒以肥姐造型登場大唱《歡樂今宵》主題曲，由於造型維肖維妙，驟眼看與肥姐有九成相似，贏盡全場歡呼聲。為了增加花生度，思捷更以其擅長的秋官造型與細細粒合唱《愛在心內暖》，二人最後更愈哄愈埋兼借位「狂嘴」，成為全晚一大亮點。

除了細細粒的演出內容與香港站截然不同，福祿壽先後模仿譚校長TONE獻唱《野孩子》、《祝福你》以及《LONDON BRIDGE IS FALLING DOWN》亦是全新環節，祖藍獻唱《祝福你》時，瘋狂模仿譚校長的抖腳姿勢，事後遭思捷寸爆：「喂！祖藍！你滴咗兩滴尿出嚟呀！」祖藍即回敬謂：「真係人衰諗乜都衰。」而祥仔獻唱《LONDON BRIDGE》時，由於太過肉緊，遭思捷取笑講粗口，祥師兄則反擊：「咩呀！我呢個係牛津發音。」再次成功贏得全場笑聲。

至於QUICK CHANGE環節，亦加入了新元素，包括是思捷扮林子祥唱《敢愛敢做》、祖藍扮葉啟田唱《愛拼才會贏》及祥師兄扮玉置浩二唱《月半彎》。而唱家班出身的祥師兄，是次更加插了情深獻唱環節展示實力，一口氣唱出《被遺忘的時光》、《細水長流》、《愛上一個不回家的人》、《聽海》等，期間更一度唱至眼濕濕，十分感性。

成功完成澳門站演出後，福祿壽八月將進軍馬來西亞繼續進行十周年巡迴演唱，三子更承諾屆時會再加入新元素，令人十分期待。