（網上圖片）
宜家，ABCDE，呢幾個英文字母嘅背後意義，已經主宰緊全世界未來社會發展嘅命脈，塑造緊一啲可能、一啲幻想：人工智能AI、區塊鏈blockchain、雲端cloud、大數據bigdata、電子支付e-payment，呢啲技術，就好似以前嘅internet同smartphone一樣，好可能成為劃時代改變世界、革新幾代人行為模式嘅產物。
人腦唔夠人工智能嚟，小至捉棋、recall記憶、寫文章，大至設計、運算、比反應、學習能力，全部都唔係佢果皮。當chatbot同機械人代替晒啲CS嘅工作，翻譯同寫文章都可以自動做自己寫埋，連copywriter同translator都唔駛請，司機變成監察自動化行車果陣時嘅technician操作員，人嘅工作，就只係需要確保能源可以源源不絕咁供應、軟硬件automation可以暢順運作，咁人嘅工作，就可以完成嘞。將來，交易暗做匿名做無需做帳，連交功課果陣都無得抄唔駛抄，連想check吓邊啲人質低個價拋貨都唔得。全部資料去紙化，書局、文具店可以全部收皮，到時，每區開多幾坐數據中心、研究中心就差唔多，起樓？你傻咩？啲大嘅廣告公司、market research公司全部收擋，出街唔駛帶錢、過數唔駛用卡、借錢唔駛去銀行，因為銀行分行都會無晒，全部虛擬銀行搞掂晒。只要有條link有個code，你畀錢我、我畀資料你，咩都搞掂晒，快到無輪。走佬走人走數走資，全部都易過借火。
宜家，究竟係咩世界？將思考外判比AI、溝通傳訊交易外判比blockchain、記憶外判比cloud、分析交托比bigdata、財務交易完全依賴e-payment，結果係，人人無咩好搞，除左搞機搞program搞code，好多人已經失去左佢原來上天所賦與畀佢嘅能力。宜家，已經無人會記住其他人嘅電話號碼，因為無人習慣聽／講電話。明明成個人企左係度，你都唔會當面問佢野，你只會之後text佢來回乒乓幾十次。有email唔用，連contract都只會係whatsapp度發。唔會再有人畀錢夾錢買蛋糕，個個都只會問你有無payme或者alipay/wechat pay？就算跌左900幾點都唔駛驚，電腦AI已經幫你做左野。嘩，點解呢個時間會有人入侵你屋企呀？個App同個電子鎖會響會alert你，望望吓，原來係呀女帶左個同學上嚟溫習生物科技課。
將來，係呢個社會生活嘅人類，唔知仲有無位置呢？
