（網上圖片）
成日回憶，成日回想，做人幾慘。因為，除左記憶以外，你已經再無其他新嘅added-value或者accomplishment，係值得比其他人同你自己好好記住，即係代表，你嘅人生，已經徹徹底底完左，你嘅靈魂已經深深被「過去」鎖住左bundle左，走極都走唔郁！好事定壞事？
「以前做你呢行都幾好做啊！」
「係呀，以前做廠幾好呀，曾經有成千個工人，之後因為啲單愈來愈少，縮吓縮吓得返幾百個人，之後，都養唔起喲，最後啲仔又無人肯接手啊，咁咪索性執左佢啦……」
「咁之後呢？」你追問。
「之後？咪半退休，打吓風流工、收吓租咁囉，風平浪靜咁過下日子啦……想當年，我呀，一條友，帶住幾個夥計，飛左去德國，參加個大展覽會，英文字德文字都唔識多隻呀，都比我殺到張單呀，你話我係咪堅先……」
「係呀！」你附和。
「仲有呀，當日啊Albert呀，宜家成日出嚟做訪問果個十大創業家呀，係我徒弟嚟架！想當年，有人話睇好我盤生意，想出價買呢，不過，我唔賣之嘛，我都係覺得，自己做皇帝過癮啲……仲有呀……」呢位邊講邊吹出一串串煙圈嘅大叔，同隔離位果位大哥，正在興奮開心地吹水中。
係人都會懷緬過去，尤其果刻係光輝嘅過去；如果，你有嘅話。如果咁不幸，你無，唔通懷緬不幸咩？除非你鍾意自辱。
係人都會成長，係人都會記住啲刻骨銘心嘅人生片段：第一次考試攞滿分老豆獎你買左呢世人第一部手提遊戲機比你、第一次成功約到個係玩電話line/ICQ識嘅異性出嚟玩、第一次大學畢業影畢業相同去畢業旅行、第一次出足糧之後買一隻見得吓人嘅錶同有牌子嘅袋自我獎勵一下、第一次自己走入一間車行買架一手車有人肯願意客氣地招呼你、第一次受邀請去電台接受訪問有人會專心聽你講野、第一次睇演唱會有人帶你入後台同明星影相集郵做收藏家、第一次入醫院做手術訓係麻醉室等醫生同你落麻醉藥果時出名幽默嘅你竟然對於醫生同護士之間講嘅笑話毫無感覺無動於衷而果刻你先知你心裡面最想見邊個人同原來你好驚死好怕醒唔返……
係人都會有傷痕，係人都想蓋住一啲經歷。你有無試過，點努力都忘記唔到一啲片段啊？你老豆生cancer咁耐醫足咁耐都無咩野，佢突然係香港醫院死果日正正係你同朋友去左外國幫你慶祝正日生日嘅trip到埗當日入到酒店房準備飲第一杯酒果陣時，電話到，家姐call，果十秒，幾句話，你用左幾個月都消化唔到，你過唔到呢關，至少，起碼幾年嚟你都唔想再提起「生日」呢樣野。你果隻養左7年嘅狗突然發現有病，生左粒切同唔切根本無咩分別嘅野，三期，你見住佢日日捱吓捱吓野又食唔到行又行唔到口水不停流，你帶佢去醫院，獸醫同你講「支針已經ready啦，隨時可以」果刻，你企左係房出面，個心好唔捨得，理性上你又唔想佢繼續辛苦落去，但係，問題係，你問自己：落到手咩？真係可以咩？ 果十秒，做決定，比起你平時叱吒風雲於商業上嘅所有野，都嚟得艱難。
無錯，生離死別，死人冧樓，永遠，特別深刻。
係人都會選擇記住熟悉嘅感覺同片段，但唔係個個都識得放開，不幸嘅放唔開，而美好嘅、成功嘅經驗，更加會死抱住唔放，分分鐘仲成為你唯一嘅standard同benchmark去judge人地。你以為好多人會似elon musk同雷軍咩？Model of「成功、賣左佢、再成功、複製成功、然後持續成功」咁呢？Sorry呀，佢地係exceptional，因為大部份人只係識評論人地，或者評論人地嘅評論。
宜家，每當你見到果個做戲變臉勁過川劇嘅美國總統，有無少少懷念兩位布殊、克林頓同奧巴馬呢？當你聽到黃子華話收咪唔再做之後，果啲棟篤笑片段，有無好似周星馳啲戲入面嘅對白咁，倒背如流咁係你腦海中盤旋？當你聽到胡鴻鈞果首「遙不可及」，有無突然間諗起陳奕迅首「crying in the party」同「不如不見」，或者林子祥首「追憶」？當你見到伊巴謙莫域果種離開曼聯去美國發展登頭版ad果種霸氣，我即時就諗起踢過熱刺型到飛起嘅真路拿、瀟灑到咩咁嘅巴治奧同宜家做埋祖記管理層跪地求球證嘅利維特。聽聽吓supper moment，果種熱血澎湃有heart嘅感覺，又令我諗起beyond、britpop最好嘅時代Suede同埋pop-punk。所以，係街度你見到其他狗主人放狗果陣時，想起一刻：有無後悔想當年你落親手送佢走嘅呢個決定，唔知佢係天堂玩得開唔開心呢？而去到每年2月9號呢一日，你會諗起嘅野，係你原諒唔到嘅自己為左生日去玩而陪唔到老豆最後一程嘅死衰仔，定係單純嘅老豆死忌呢？
緬懷過去，定刻意淡忘？悔恨當年愛得不疚定係愛不夠？宜家，你係放不疚定放得不夠？回憶、緬懷，本身唔係問題；個問題係，你成日希望係回憶、緬懷裡面搵出答案，去解決宜家你面對緊嘅問題。停止向前，係心態問題。肯向前但方向錯，係思維問題。方向無錯但跟唔上，係能力問題。而全部人都有問題，只係你無問題，呢個就係最大嘅問題。
