（網上圖片）
一個成年人，態度差、性格差、說話差、心地唔好，原因好多時係因為童年時過得唔開心，諗法負面，同其他人關係唔好，成長過程嘅挫敗感，日積月累而影響到工作、姻緣、財務、健康、社交機會等咁多方面，於是，惟有透過一啲尖酸刻薄嘅說話、睇你唔順眼嘅態度、黑過墨汁嘅嘴臉、勁過gordon ramsay嘅批評嚟對人，折射出潛意識對自己嘅不滿。呢種，係狼狽嘅人，無論人生、定做人態度，都好狼狽，負能量到爆。
有人鍾意流浪天涯，花幾年時間backpack幾大洲幾百個城市；有人賣左自住馬鞍山間屋，搬左入去塔門住只係想親近多啲大自然；有人放棄做bank嘅專業，去搞音樂事業做音樂培訓做啲自己認為可以帶比其他人快樂嘅事；有人唔做醫院護士放棄穩定人工，投資飲食生意酒吧食材飲水機，將自己嘅公關marketing細胞發揮得淋漓盡致。呢種，係浪人，浪漫嘅浪，率性、隨意、對自己負責任，用對手跟住個心去走。
有啲人，努力以赴做野，不眠不休，meet target又爆target，被人玩又玩人，爭位爬位上位企位樣樣做齊。有人可以只日用50蚊，經過八年唔食唔玩唔買野唔結婚唔社交唔出國唔比錢讀書放棄晒全部需要用錢做嘅野，只係為買到層800幾萬嘅單位。又有人不停同投資者做pitch攞funding搞生意開始新業務，公司開完一間又一間，騙局set完一個又一個，投資者上當一次又一次，自己個戶口多左一個又一個零頭。呢種，係狼人，為左目標，做野狼手法狼過程狼。不過，唔全盤了解他人，唔好輕率妄下結論。因為更狼嘅人，都有唔狼嘅一面。反而，你要了解嘅係，點解佢在你面前，唔可以卸甲呢？因為你係衰人、你會騙人、你都係同類人，所以對方要防備你？
唔係個個人都咁好彩，會在對嘅時空、對嘅子宮中，幸福地出世。如過無，就好可能要捱住成長、捱住生存、捱住過生活，自我調節機制，變成唔同型態，去迎合呢個世界。
上星期過新年時行山，由中環行上山頂，纜車排隊人龍好長，不過對旅客嚟講，幾長都會等。經過山頂公園，好多人在玩，情侶在hea，一家大細在野餐，玩cosplay嘅在影相。突然，旁邊有把雄厚嘅聲音劃過我耳仔，「你知唔知呀，爸爸細個都係呢度玩呀！你睇吓果邊？」他指住草地上面跑緊步同踢緊波嘅一對男孩，然後，他就帶住囡囡，走左過去樹底下，搵個靚位坐低。我望左一望呢位係Mount Austin Road嘅公園入面、目測應該大概三十幾歲嘅daddy，佢拖住一位貌似韓籍嘅老婆同一位望落大概三歲左右嘅小女兒，好有自信同壓場感咁邊行邊講解，好似好熟悉呢個地方咁呀，成個local tour escort。而我呢，作為九龍人，都係第一次行呢邊山、先誤打誤撞咁行左入嚟呢個好似世外桃源咁靚嘅公園呢！但如果，呢位小女孩嘅肉身，剛巧於另外一個子宮出世，長大個過程時阿爸可能會逢星期日邊睇馬、邊教佢用手機買位置Q同單T，落街同其他小朋友同佢地嘅老豆老母排隊買飯盒食，係唔會有機會身處山頂睇住日落嚟玩。
唔同圈子，會限制左你嘅想像力同對世界嘅理解能力。
行落山嘅時候，遇到幾個已經來港定居但仍帶有少少白話口音剛剛由堅尼地城行上嚟登山嘅家庭、一對男士係德國人女士係菲律賓嘅couple、一個由爸媽仔所組成嘅local三人行家庭、同一對來自奧地利Vienna本身係上海實習剛到香港順路玩幾日跟住就轉去日本澳門深圳玩二十幾日仲讀緊urban planning嘅情侶，我地一齊行吓又chit chat吓，最後，就用左個幾鐘、經過動植物公園行返落去長江大廈，個感覺好chill好international好健康。不過，當你返到現實世界同office果時，就好似wolverine上身咁，因為唔狼死，你生存唔到呀。
經歷過狼狽嘅人生，為左保障自己，成為狼人。之後，亦為左成就自己，令自己開心，成為浪人。無論用咩型態面對世界，請好好珍惜你嘅人生，無論點都好，宅又好，衰到一無所有都好，都唔好帶住自己嘅仔女尋死，或者同歸於盡，唔該。你可以自己狼狽，但唔好拉埋其他人落水，唔該。
