（網上圖片）
個個都話o2o做網購，唔通個個都識做咩？你問吓人，做個可以購物嘅網頁，唔係齋product catalog，最重要嘅concern係咩呢？其實網購應該點搞呢？個UI同UX好唔好，夠唔夠user friendly？設計內容簡單、簡約、清楚嘅潔淨程度？由睇野、落單、畀錢、跳頁/唔跳頁、揀選物流方式、等貨到完成嘅整個購物過程嘅流暢程度？用paypal、stripe、V/M定微信收錢？可以物流自取、定揀到店到家到辦公室收貨？服務有無SSL夠安全未？有會員分級系統、計VIP客同大客嘅積分累積換野？品質同服務保障、退貨策略又點訂？咁marketing又點做呢，social media又點管理呢，吸客引客留客的技倆，仲有數據分析報告，real time實時性、客戶消費群嘅demographics、acquisition攞客嘅方式、behavior消費者嘅固定行為模式、conversion rate堅買野嘅比率、客人order落單同逗留每頁網頁嘅流量平均時間分析、seasonal promotion嘅設計同吸睛poster果句tagline嘅設計文稿，搵邊個物流運輸公司同你長期合作partner……係咪頭都大曬呢？
Every coin has two sides，當你唔駛比鋪租，仲可以7 x 24營業，心諗，做呢樣生意實無死啦。更何況，買野講衝動，上網買野只係press幾個button就掂，果種衝動而帶來後果嘅壓力同阻力完全無左，所以宜家啲shopaholic多左幾多呀，幾多人一上網，就買左一大堆根本唔會著唔會用嘅野呀！你享受緊網購嘅方便，亦同時受緊食緊佢帶比你嘅潛在負面影響同啲屎。
好嘞，之前有朋友話想搞網購，但唔想投資錢做啲無咩把握嘅事，所以，就在ig開左個店，日日放啲在東莞虎門黃河服裝城所買嘅衫同袋，markup兩、三倍出貨，個總單價每件產品都係唔過港紙一百蚊，對佢來講呢個方法營運成本最低最安全。於是，日日放工就帶貨、去唔同地鐵站閘口交收，就變成為生活一部份。不過，上手遲又搞到之後成串安排都遲左，又試過自己突然工作要OT準時唔到派貨比客比人串到上天花板；想搵啲面交公司幫手派貨做又試過甩單，自己每日對單、埋數、覆客又麻煩又細微，做做吓人都顛，話搞唔掂啦。當佢親身經歷過之後，發覺原來無想像中咁過癮，相反，其實仲幾困身呢，令佢知道網購原來係一個經過龐大體系運作出黎的成果同結果，並唔可能係一個個體戶所做得出嘅事！不過，一雞死一雞鳴，大把人都係爭住做；一個朋友退出，另一些朋友就陸陸續續加入。
我成日都話，你唔係product owner，唔好突然間興起就諗住做個平台出嚟。你無design sense，求你，咪搞個UI。如果你真係想做個購物平台出嚟，但係搵唔到大品牌支持、星級創業基金投資者科水，咁就請你索性唔好搞嘞，因為用自己錢唔知可以燒幾耐、頂幾耐，與其咁有風險，不如唔好做，輸少當獎咪算啦。可能你又會見到，連萬達都比騰訊、京東入股，連傳統地產、商場行業嘅巨無霸，都要搵網購公司打救，你就知道傳統零售無得做，只有網購先係出路。係，鬼唔知咩。不過，人地係霸主，已經manipulate左成個market，又半政府支持，佢唔係二打六呀，啲錢多到買起成個國家都夠呀，你係邊位？都係無機會架啦。然後咁你又會話，點解shopline可以做到，你唔可以比我係第二個shopline、第二個openrice咩？我話好呀，咁你試吓，努力啲做啦！跟住，我就幫佢係godaddy註冊左個為期兩年嘅domain，然後佢問我開網頁weebly定wix好啲，做宣傳應該開fb定ig先呀，我於是就將上面第一段所需要啲野問吓佢啦，點知，佢……竟然，係。唔。知。我。講。咩。
我問佢，「咁其實，點解，你想做網購呢？」
佢話：「啲人話網上賣野好做呀，賣野易賺錢呀嘛，咩原來咁複雜呀？」
「你有幾多budget做呀？」
「幾萬蚊囉！一個月兩、三千蚊廣告費夠未呀？貨我自己嘅，成本易計啲呀！」
「……哦，咁平時個網店邊個睇呀？」
「我有一個marketing妹妹，幫我睇住呀，唔駛驚。」
呢次，係佢開店之前，我最近一次同佢飲茶果陣時，佢對於網購嘅睇法。後來，我知佢開左店，做左一年，半摺狀態，宜家想搞吓啲pop-up store，始終，傳統人都係比較鍾意傳統方法，有鋪有辦法，無鋪唔識搞，做開一買一賣簡單直接，你叫佢學過啲新model做法，想攞人命咩。所以，做網購，其實通常最大得益方，好大程度係物流服務供應商、平台本身、廣告agency或者各大宣傳嘅channels，反而唔係個operator或者貨主。等於商場發展商租個鋪位比你搞野，你估最終係你定個發展商最終利益會大啲？你又估吓宜家果啲cryptocurrency嘅交易平台同個ICO owner，當有隻幣炒起左嘞，究竟係佢地定係你作為投資者會賺多啲呢？宜加，邊個成日話網購好、話無人商店好、話電子貨幣好、話automation同AI分析好，其實係對你、對企業、定對做緊呢啲野果班人好呢？
世界唔會有無緣無故的愛，和無緣無故的恨；世界潮流亦唔會有無緣無故的吹噓和追趕，和無緣無故的否定和衰落。每種思潮、每種刻意嘅indoctrination，都係代表著一群人、一個/數個龐大集團嘅自身利益、生意機會和等緊搵著數返身嘅契機。你覺得自己夠能力搭呢趟順風車嘅，你可以搭；唔夠道行嘅，千祈唔好！傷死你，輸死你呀。
網購。生意。堅好做？
