雷晴雯演情緒病人憶亡母 劇本還原觸痛處喪喊難收

藝人雷晴雯Winnie ​日前出席由梁成致（Sam哥）出品及執導的電影《極闘6之飄移都市》煞科宴，於戲中飾演遺傳性情緒病患者的Winnie於接受訪問時表示，演繹呢類型角色一直是她多年來的心願與夢想：「其實渴望咗好耐，因我媽咪本身有好嚴重嘅抑鬱症，幾十年來飽受歧視及折磨，一直活於壓力痛苦之中，所以一直都好想可以為情緒病患者出一分力，帶俾大眾更多情緒病方面嘅正面訊息及認知​。​​」

Winnie坦言這次演出是她出道二十多年來最難的一次：「要戰勝心中陰影同點樣令自己跨過那道心理關口的確好大難度。呢個角色無論人物性格、家庭背景及經歷本來就已經同現實中嘅我似足八成，但最令我驚愕嘅係同雪梨姐嘅一場母女戲，當中除咗時間地點唔同之外，其餘所有情節對白竟然係同當年發生喺我及媽咪身上的近乎『神還原』般一模一樣，真係接到劇本已經喊，拍完Cut晒機都仲繼續喊，完全收唔到。」

面對如此真實的劇情，Winnie不諱言其人生歷練對角色投入有一定幫忙，但亦因角色觸及心底痛處及負能量太大，得用好幾日方能從情緒中抽離：「今次演出確實係一大挑戰，希望透過今次演出令更多人明白同理解情緒病患者嘅感受，給予更多的耐心及關愛。」