每日都認真做gym，但體重就總係無改變？如果你嘅飲食習慣正常，咁問題好可能就同你所做嘅運動有關。

據Pressform報導，美國國際體育協會認證、健康營養網站創始人John Rowley指出，原來好受女性歡迎嘅4款運動對瘦身減磅都係無幫助㗎！

1. 瑜伽（Yoga）

瑜伽的確對身體好處多多，但John Rowley強調想減重最重要係加速新陳代謝，但瑜伽只係可以修飾身體嘅線條、令肌肉更有力，並唔可以燒脂減重。

2. 室內單車（Indoor Cycling）

室內單車機喺gymroom相當受女性歡迎，原因係可以一邊睇住手機煲劇一邊做運動。但原來咁樣反而會令人不知不覺間運動過量，拉傷肌肉。同樣嘅鍛鍊時間，John Rowley指跑步或跳繩可以消耗嘅熱量會高得多。

3. 混合健身（CrossFit）

混合健身結合體操、重訓等多種訓練模式，包含TRX、sit-up、深蹲等。因為唔需要咩器材，大家喺屋企就可以做，因此係好多人喜愛嘅運動模式。

但混合健身主要作用係雕塑線條同肌肉，減磅效果有限，加上無專業教練指導、姿勢唔正確就好容易受傷，尤其係本身無做開劇烈運動嘅人，所以千奇唔好亂試啊！

4. 只做有氧運動（Cardio-Only Routines）

有氧運動可以燃燒大量卡路里，但其實唔係搏命做就啱的！因為有氧運動同時會令人好肚餓，所以如果你搏晒命做，但到頭來又食返加倍份量嘅食物的話，咁只會得不償失。

另外，只係做有氧運動會令身體嘅肌肉流失，即使瘦咗身形都唔會好睇。所以最正確嘅方式係做有氧運動＋重量訓練＋伸展。

（圖片來源：tumblr）