無論平時嘅自拍幾靚都好，一到影證件相就唔知點算好？因為既無得就角度，更唔可以用美圖程式P圖，咩缺點都暴露晒出嚟，真係形象大崩壞啊！
其實想影靚靚證件相唔使飛到去韓國嘅，只要掌握以下5個tips，花點小心機就已經可以將你影得靚靚！
1. 頭髮唔好蓋頸
唔好以為遮得愈多塊臉愈瘦，事實係頭髮遮住頸，反而會令你條頸望落好短，塊臉會顯得更大！
2. 跟身型揀色系
無錯，深色系可以顯瘦，但如果你本身體型唔係太肥，其實著柔和嘅色系，例如米白、淡粉嘅衫反而會顯得你更加白淨，而且仲更有親和力添！但如果揀左淺色衫，就千奇唔好著冷衫等厚重、顯胖嘅質地。
3. 跟臉型揀衫領
如果本身面型圓，可以著返V領嘅衫，有助拉長臉型。但如果本身塊面已經屬於偏長，就應該要揀圓領衫，否則影出嚟就會變「長面人」。另外仲可以揀衣領闊啲、可以輕露鎖骨嘅衫，望落就更顯瘦同帶點小性感！
4. 練習微笑
笑係一門高深嘅學問，亦係決定上鏡靚唔靚最重要嘅一環。想笑得自然，事前就一定要好好練習，唔好搞到好似肌肉唔協調咁啊！
5. 影相前吸一口氣
影相前吸一啖氣，會令雙眼不自覺地撐大，而且表情無咁僵硬，背部亦會自然地挺直，係必學嘅一個竅門！
（圖片來源：tumblr）
