打工仔最怕就係突然被炒魷魚，當你仲諗緊自己留喺公司度大展拳腳，plan緊升職加薪嘅大計嘅時候，首先留意自己係咪站得穩住腳先啦！
唔好錯過身邊嘅線索，時刻保持警覺，如果唔係真係俾人請食豉椒炒魷都未知咩事。
留意以下嘅8大徵兆，如果唔好彩中咗大半嘅話就真係要揾定新工喇！
1. 你被分配「不可能嘅任務」
如果突然被分派好難甚至乎係唔可能完成嘅工作，你就要諗會唔會係上頭特登刁難你，要你感到挫敗，繼而知難而退。
2. 你獲派嘅工作項目明顯減少
除咗不可能嘅任務之外，獲派嘅工作明顯減少都係被炒嘅徵兆。
3. 上司/老闆曾對你作出警告（超過1次）
唔一定係warning letter先係警告，就算只係口頭警告，或者只係對你嘅工作表現有怨言，你都要打醒12分精神。
4. 上司/老闆時刻監視住你
有無感覺上司或老細經常捽你，問你呢樣做好未、嗰樣進度去到邊？如果有嘅話，你好可能已經成為佢嘅眼中釘。
5. 你令公司出醜或虧蝕一大筆錢
呢個情況就算唔使人提，你都心知肚明啦……及早揾定後路，寧願自己炒間公司先！
6. 上司有問題會直接揾你嘅下屬
假如你發覺上頭或老細有問題嘅時候竟然繞過你，直接問你嘅下屬，你就要反省自己嘅工作表現，同埋諗吓有無人喺你背後搞小動作喇。
7. 你發現睇唔到某啲重要資料
假如公司已經有炒你嘅打算，首先就可能靜靜雞鎖咗你權限，唔俾你睇到公司嘅內部重要資料。假如有呢個情況，可以話百分百準備被炒！
8. 上司落重要決定時無問到你意見
當你嘅意見喺上頭眼中已經變得毫無價值，咁你可以留喺呢間公司嘅機會就等如0。
（圖片來源：tumblr）
