【壽星女】佘詩曼生日傷眼堅持玩直播

生日傷眼不忘承諾，佘詩曼錫晒粉絲，忍痛玩直播。

佘詩曼今日42歲生日，破天荒跟全世界的粉絲「同慶」，分別在facebook及微博大玩網上直播！不過，阿佘的生日直播卻比原定時間遲了一小時才開始，而且出現畫面之上的竟是「獨眼佘」！原來阿佘今早起身後驚見右眼紅腫，要趕赴醫院睇急症，但為兌現跟粉絲的承諾，決定頂硬上堅持玩直播！

阿佘在fb直播時笑言要公開尋「真兇」：「今朝起身右眼紅腫，眼球好似刀割咁痛，我仲以為自己視網膜脫落，估唔到生日都要去醫院⋯⋯我昨晚同大班朋友慶祝生日，究竟係邊過插我隻眼搞成咁，快啲講⋯⋯我唔會嬲！」

短短半小時的fb直播，吸引了來自世界各地的「佘粉」捧場，阿佘作首次網上直播可謂不拘小節，既與網友分享「偒眼」，亦選擇在家中取景，讓粉絲一同「入屋」，就連親手沖咖啡、補妝等都在鏡頭前任睇，在拆朋友和粉絲所送的生日禮物時又開心得手舞足蹈，表現率性。談到未來的工作，她透露即將遠赴檳城拍戲，還希望在當地舉行沙灘泳衣派對。