一個由哈里斯民意調查（Harris Interactive）嘅最新研究顯示，愈高壓力嘅工作導致員工增磅的百分率就愈高！
到底係邊10種工作壓力最大，又最容易致肥呢？
1. 導遊
導遊嘅工作就係要規劃行程、盡力湊得班團友開開心心，旅途間仲要面對唔同嘅需求同突發情況，真係IQ、EQ低啲都搞唔掂。
2. 律師
律師嘅工作就係要不斷思考唔同嘅論點、準備嗰陣又需要翻查同研究大量案例，仲要諗埋對家嘅理據同反駁，面對住極大嘅壓力，自然就有更高風險增磅！
3. 社工
社工除咗好多時要坐定定處理文件之外，好多時仲要家訪探望自己負責嘅家庭或唔同人士，唔係個個都會咁合作，社工都要花好多心力同佢哋溝通同埋諗解決方法，真係好費神㗎！
4. 老師
老師除咗教師之外，其實仲要兼顧好多行政事務，又要面對嚟自上頭老師、校長，甚至係家長畀嘅壓力。就算完咗一日嘅課堂，都要批改作業同備課，真係無收工時間。
5. 藝術家、設計師、建築師
雖然呢幾種職業好多時都需要獨立同彈性地工作，佢哋依賴嘅係創作力同靈感，所以唔需要逼到自己嘅時間咁緊，但正因為咁佢哋鍾意悶悶哋就食嘢，食幾多幾時食都無問題，又經常坐喺度創作，唔覺意就會食肥咗！
6. 行政助理
行政助理嘅工作就係隨時都ready為上司打點同處理唔同嘅事情，要同唔同嘅人同部門溝通，又要明白上司嘅心意，所以每日都要面對好大嘅壓力。
7. 科學家
科學家經常都停留一個地方思考，亦好容易為研究廢寢忘餐，飲食唔定時都係致肥嘅原因。NASA仲會鼓勵職員喺工作時間做吓運動同舉辦唔同活動嚟幫大家對抗增磅！
8. 警察
警察除咗表面嘅捉賊、查案、當更之外，亦要面對上頭加予自己嘅壓力。尤其係近年嘅警民關係鬧得咁僵，警察甚至會被朋友、親人排斥。
9. 公關
公關又係無固定時間嘅「全天候」工作，除咗要出席唔同嘅活動、隨時隨地照顧客人嘅需求，亦要出席唔同嘅應酬，經常飲酒、大魚大肉絕對係增磅黑手！
10. IT
IT係科技與創意工種嘅融合，上至寫program寫code，下至公司wifi鬆咗個插頭都關IT事，額頭鑿住IT兩個字嘅朋友往往就係「萬能」嘅代名詞，仲要經常加班，所以飲食習慣都唔太好。
（圖片來源：sync blog、tumblr）
