每逢假日,宜家傢俬都會逼滿人,當中有幾多係真係為咗買傢俬呢?相信有唔少人都當Ikea係行街地點之一,參觀唔同房間設計,幻想吓將來自己屋企要點佈置,行到最尾就梗係要食番碟瑞典肉丸、牛扒、薯條作為宜家之行嘅完美句號啦。

Fast Company嘅調查發現,原來行Ikea嘅人當中有3成都只係幫襯買嘢食,並唔係嚟睇傢俬。而喺2016年,Ikea食品喺全球嘅銷售額就高達18億美金!有見及此,Ikea就有意將餐飲服務發大嚟搞,唔再只係傢俬部嘅附屬服務,而係經營純粹提供餐飲服務嘅Ikea餐廳或cafe。

至於計劃詳情或發展嘅時間表係點,就依然係個未知之數。但聽到呢個消息,相信絕大部份人,尤其係瑞典肉丸嘅fans都相當興奮,就等我哋一齊期待吓啦!

(圖片來源:IKEA)