每次去食碗魚蛋粉，身邊總有人會叫「走青」，拒絕食蔥、蒜、莞茜呢啲有濃烈氣味嘅佐料，而今日要討論嘅主角就係莞茜。莞茜比起蔥蒜嚟講，每個人對佢嘅喜惡更加兩極，鍾意嘅人成棵食，唔鍾意嘅人見到碗湯有一塊葉都即刻嗌換。
香港人最鍾意旅行去嘅日本，近年更不斷推出用莞茜整嘅周邊食品，大推莞茜成為新興嘅健康食物。日本便利店Lawson喺剛過去嘅兩個禮拜更加搞咗個莞茜祭，推出多款莞茜食品，包括芫茜意粉、檸檬水、爆谷等，款款都青咇咇咁，實行要唔肯食莞茜嘅人去到邊都無得避開佢嘅蹤影！
▲芫茜祭食品
▲芫茜意粉
▲芫茜檸檬水
▲芫茜爆谷
但到底係咩原因令某部份人咁抗拒食莞茜呢？只係喜好問題或者係偏食咁簡單？根據美國基因學家嘅研究發現，原來係同我哋嘅基因有關！喺討厭莞茜嘅人身上都揾到OR6A2呢組嗅覺基因，所以對莞茜中嘅醛類化合物（aldehyde）特別敏感，令佢哋覺得莞茜嘅氣味好似有番梘或泥臭味。
知道咗呢個原因之後，相信討厭莞茜嘅人就可以更加大條道理咁同莞茜SAY NO喇，因為基因嘅嘢想改都改唔到！
（圖片來源：lawson）
