一大班朋友玩嘅時候，同心儀嘅對象一齊有講有笑當然容易，但如果到大家都互相有好感、約出嚟單獨約會就完全唔同講法喇。兩個人去嘅地方、傾嘅話題都要好小心，因為初次約會分分鐘已經為一段關係定生死，唔小心講錯嘢令對方對你嘅好感盡失嘅情況係好常見㗎 ！
韓國就針對呢點做咗個調查，統計出7個初次約會唔應該問嘅問題，想下次約會順順利利，喺對方留低個好印象，就千祈唔好犯錯啊！
問題1：你爸爸做咩工作？
第一次出街就查人家宅，問人哋家父做咩工，感覺唔禮貌之餘仲非常功利，似想知道對方家底有無錢，先再考慮發唔發展。
問題2：你人工幾多？
同上一條問題唔應該問嘅道理一樣，雖然咁問唔係查人家宅，但第一次約會就直接問人人工幾多，人哋只會覺得你貪錢、勢利，即使本來對你有興趣都即刻想調頭走……
問題3：你支持邊個政黨？
雖然兩個人拍拖嘅話，了解對方政治嘅取向都係必需嘅。但如果只係第一次約會，就應避免問太深入嘅問題。先比對方一個基本嘅好印象先，第日有機會先再深入了解！
問題4：你的宗教信仰係咩？
理由同問政治取向一樣，政治、宗教都係比較嚴肅嘅話題，當對方嘅為人、性格都未了解嘅時候，就應避免呢類較有爭議性嘅話題。萬一兩個人嘅取態相反，隨時嗌交收場！
問題5：你幾重？
記住無論咩時候，年齡同體重都係女人嘅秘密。假如對方係有啲肉地嘅，仲要俾你問條咁嘅問題，隨時會覺得你嫌棄佢嘅身形，甚或乎係取笑緊佢！
問題6：你覺得我點？
大家只係第一次見面就問呢條問題嘅話，除咗會俾人覺得太急進，仲會諗你為人會唔會太正經，講咩都好似要發表論文，係個超級大悶蛋。
問題7：有關前任嘅話題
第一次見面就問人哋嘅前任，除咗急進之外，如果對方喺上一段感情有唔開心或者被傷害，就好似俾你挖開瘡疤咁，回憶起過往嘅痛苦，感覺一定好難受……
（圖片來源：daily urbanista、tumblr）
