之前，同澳門朋友吹水，講到酒店業服務業，他們都說，有些地區的人，最麻煩最難湊，比個統稱佢，叫「SHIT」。
我問，「SHIT」是甚麼？屎呀？他們說：「Singapore，Hong Kong，India，Tourist」
我笑爆咀，之後我問，咁中東與大陸同胞，唔通唔麻煩唔難湊咩？他們話，中東與大陸同胞頂多只是吵雜一點、污穢一點，但SHIT的朋友可不只是這些問題，而是態度與說話上的問題。
他們說Singapore朋友，多是非常高傲、有種傲視世人的氣焰，一定會要求其他人配合他們的要求，是出於指示的態度，而非像是提出要求的態度，明明間房要準時還但一定要late check-out因為研討會未完唔可以退房云云，甚麼理由都是原因，總之一定要周圍的環境，去配合他們大帝的行程啦！
而香港朋友呢，則非常喜歡拿著數，算死草，又熱衷投訴，成日叫經理出黎投訴咩咩咩，動輒就要upgrade，他們試過處理過一個香港客，因為房間的床單有一點污漬，就在大堂大吵大鬧，又打電話向公司投訴，send email去website enquiry form炸site，就算酒店願意換另外一間房個客都唔肯收貨。最後，要free左4位buffet晚餐，先可以成功拆彈，成二千幾蚊的buffet compensation，竟然仲貴過間房book一晚價值本身，所以令他們印象深刻。
印度呢，則非常古惑，成日講說話唔算數，又非常喜歡走數，仲鍾意屈人。有人試過無話過比一些privilege offer比個商務印度客，但個印度客堅持話有，不外乎是關於訂conference room和客房的優惠，只是3、4百蚊美金的差別。最後，case順利settled，澳門朋友比經理照肺，印度客砌生豬肉成功，攞到彩之餘又可得到他想要的優惠offer，只是朋友心有不甘吧。
當然，這都可能只是以偏蓋全的例子，某些人的特質不代表整個文化、文族的特性。可是，日本的禮貌、德國人的嚴謹、法國人的浪漫、英國人的幽默，都已經是深入民心，已是stereotype，好像已是既定事實一樣。等於做生意時，人們常說中國人的壞、香港人的度、台灣人的算，都是事實一樣。
講到尾，老老實實，比得起錢的話，難湊點，咪死頂囉，反正係工作一部份，無人想同錢作對呀，願打願捱，悉隨尊便啦。但若果個客比唔起錢的話……你無得揀，都要死頂啦！
你唔能夠改變客人的質素，但你實力夠的話，你可以拒絕某些不夠質素的人成為你的客戶。
夠力有得揀，無力比人搓。
