男人同心情仲複雜過天氣嘅女人相比，的確係容易捉摸好多，而且為佢做少少嘢已經好容易滿足！
想令身邊嘅男人對你留低美好同深刻嘅印象，其實無想像中咁複雜同艱難，簡單嘅一句說話已經可以令你喺佢心目中大大加分！快啲記低以下嘅15句說話啦！
1. 「今次我畀錢啦。」
男性好多時都要肩負住好多花費，尤其係同女仔去街，為咗展現風度都會幫女仔埋單。但記住唔好當男人咁做係老奉啊，除咗對佢咁嘅做法表示多謝之外，間中仲可以主動埋單，咁對方一定驚喜得嚟，仲肯定你唔係港女！
2. 「你好man啊！」
就算男人認唔認都好，佢哋心裡面都一定好想展現自己夠硬淨、充滿力量嘅一面，女人可以適當哋揾機會讚吓佢，佢哋就會好開心㗎喇！
3. 「你知唔知你其實好有魅力？」
比起女性嚟講，男性比人讚嘅機會少好多，就算男人幾好都好，都比較少人會當面讚佢哋，尤其是係喺外貌、打扮方面。所以你可以讚吓佢，講埋佢邊啲地方吸引人，咁你嘅讚美就即時變得更加真誠喇！
4. 「我好欣賞你嘅性格。」
呢句讚美比起外表嘅讚美嚟得更深入，因為性格比較貼近一個人嘅本質，唔同外表或者利益掛勾！
5. 「我愛你。」
呢句說話唔止對女人意義重大，對男人都一樣咁重要！每個人都希望被愛嘅感覺，話佢知你愛佢，證明佢喺你心目中嘅地位啦！
6. 「不如我哋做……」
男士聽到呢句一定即時有反應！相信無一個男人會唔鍾意床上運動，所以你開到口主動邀請，佢哋梗係會話好啦！
7. 「你同我以前遇過嘅男人完全唔同。」
女人有時會講到以前遇過或者周圍嘅男人係幾差，喺你身邊嘅男人就好似無故中槍咁，相信都未必好受。但只要你同佢講佢喺你心目中係幾咁與別不同，佢一定會好開心！
8. 「你真係一個可靠嘅男人。」
大部份男性都傾向做一家之主或者領導嘅角色，你講呢句就證明你放心倚靠佢、肯定佢嘅努力，會令佢成功感大大提升！
9. 「我喺你身邊好有安全感。」
男人最怕比人覺得弱雞，習慣展現剛強嘅一面，你同佢講呢句絕對會令佢鬆一口氣，甚至開心到飄飄然！
10. 「不如我哋今日試啲刺激嘅玩法吖。」
互相滿足嘅性愛絕對可以昇華一對情侶之間嘅感情，但留意返唔好一本通書跟到老，間中同對方試吓啲新玩法，絕對會令男人對你刮目相看！
11. 「我尊重你嘅睇法。」
港女成日被人標籤做大女人，成日食住男人，唔少男性都表示怕咗呢啲性格。假如你表示會尊重佢嘅睇法，仲會支持佢，咁一定可以令佢更加鍾意你，視你為穩定發展嘅對象！
12. 「你班朋友好好玩啊！」
女友同男朋友嘅兄弟畀人感覺總係好似係敵對關係咁，但其實唔一定㗎！假如一個女人連同男友嘅兄弟都相處得好好，一定係一個男人絕對唔肯放手嘅100分女友！試諗吓，其實同兄弟熟絡咗，男友如果有咩曳曳你都更加容易知道啦～
13. 「對唔住。」
如果你有地方做錯，千奇唔好死雞撐飯蓋！敢於承認自己嘅錯誤，先證明你哋係投入緊一段成熟嘅關係。
14. 「你今日一定唔好受。」
男人慣咗有咩唔開心都收收埋埋，但如果畀佢知道身邊嘅女人會體諒同關心佢，就算出面做嘢幾辛苦都會堅持住！
15. 「今日真係好開心！」
當去完拍拖、做完一場好享受嘅床上運動，或者係佢特意為你準備咗驚喜，你最尾都可以講呢句嚟做一日嘅總結，令對方甜笑入睡！
（圖片來源：girlterest、tumblr）
