當你要搭長途機嘅時候，除咗落機後要面對時差問題之外，機上面坐十幾個鐘一樣唔好過，隨時會出現體內日夜周期失調嘅情況！徵狀包括有疲倦、難以入睡同集中、消化不良，同埋心情變差。
要預防呢啲情況發生，最好嘅方法就係喺飛機上一覺瞓到尾！但點樣可以令你可以喺機上瞓得著，甚至瞓得好呢？其實唔一定要坐頭等或商務客位嘅，做足以下7件事，坐經濟客位都一樣可以大覺瞓！
1 小心選擇機票
程機嘅到達時間盡量揀當地嘅黃昏時分，咁就會容易啲捱到入夜10點鐘嘅瞓覺時間喇。另外，上機後可以將手錶或手機嘅時間調校到你目的地嘅時區，睇得多、習慣咗，自然就令你嘅身體同腦袋更快適應時差！
2 服用褪黑激素
褪黑激素係一種身體會喺睡眠時間分泌出嘅荷爾蒙，所以喺你想瞓覺嘅時間服用褪黑激素補充劑可以令你身體更易入睡。而需要嘅分量唔多，只要1毫克已經做到呢個效果。
3 上機前食嘢
上機前先食嘢，等身體感覺食咗晚餐，抖陣就可以瞓覺。而且咁你就唔使等食飛機餐，一上機就可以直接大覺瞓！
4 戴眼罩
光線會影響褪黑激素嘅分泌，令人保持清醒。所以如果想瞓得好，就一定要避免強光，包括手機、電腦等，乖乖哋熄晒所有電子器材，再戴一個眼罩遮光，咁就真係perfect match喇！
5 用頸枕
喺機上用頸枕會舒服好多，原因係佢可以承托住頭、頸嘅部份，唔使怕瞓著左個頭會側埋一邊，避免搞到條頸扭親，一瞓醒後發現超痛！
6 帶一樣屬於屋企嘅物件
如果想機上瞓得好，就要創造一個理想嘅睡眠環境，包括夠黑、夠靜、夠涼同夠舒服。除咗帶眼罩、耳塞、舒服嘅衫之外，仲可以喺屋企帶一樣嘢出嚟，聞住熟悉嘅氣味，自然就更有安全感，瞓得更好啦！
7 唔好飲酒
諗住上機前同朋友飲返杯盡興，又或者覺得飲醉會好瞓啲？咁諗就錯喇！原來瞓覺前飲酒反而會刺激大腦，令你更難休息！
（圖片來源：shutterstock、tumblr）
