雖然唔係每一個人都相信自己會揾到真愛或者靈魂伴侶（soulmate），但心底裡都希望可以揾到同自己夾、真心相愛嘅人走一世嘅路。但麻煩嘅係，到底眼前同自己一齊嘅呢個人係咪Mr. Right呢？呢個問題就未必人人都睇得咁清楚喇。

如果你而家拍緊拖，又講唔出到底另一半係咪真係你嘅真愛的話，不妨問自己以下6條問題，真誠面對自己，好好揾出答案啦！

1. 到底你係咪愛同接受對方兒家嘅面貌？

如果你覺得你可以改變一個人—無錯或者你係可以叫佢試吓食平時唔會食嘅嘢，或者著平時唔鍾意著嘅衫，但如果你想將一隻豹漂白成一隻貓，徹徹底底咁改變佢嘅話，咁係一件無可能嘅事，而你夾硬逼對方改變嘅過程亦會令佢好痛苦。所以問自己，就算另一半維持兒家咁嘅性格、外貌等，你會唔會都選擇愛佢一世？

2. 你係咪做緊你自己?

同佢一齊你係咪覺得唔需要隱藏自己嘅真實面目或感受，你可以盡情表現、講出自己嘅諗法或者同其他人交際，唔需要逼自己成為對方所希望有嘅伴侶呢？

3. 你哋之間有無火花？

如果對方錫你或者同你有親密行為嘅時候，你都已經無左心怦怦跳嘅感覺嘅話就要留意喇。火花唔係話有就有，如果兩個人一齊已經無左靈魂嘅契合或者心動嘅感覺，可能就代表你哋之間嘅愛將會消逝。

4. 你有無自暴自棄嘅徵狀？

你會唔會用食物填滿自己，或者覺得失去自我？家人朋友會唔會見到你嘅情況後都不斷問你有無事？如果有，你就要好好思考到底係咩原因令你咁沮喪。

5. 你有無揾到歸宿嘅感覺？

可以同一個人一齊生活、有搵到歸宿嘅感覺係件好美好嘅事，你可以挨住對方嘅胸膛或膊頭，感受佢嘅呼吸同心跳，喺佢懷抱會自然而然地有種安全感。如果無咁嘅感覺的話，記住你要揾嘅係一個真正啱你嘅人，唔好心急亦唔好記掛以前，you deserve better！

6. 你有無種直覺覺得自己行錯方向？

唔好忽略呢種硬係覺得邊度唔妥嘅直覺！因為咁係反映緊你心裡面有諗唔通嘅事，或者有不安感，唔好由得佢唔理，自欺欺人係解決唔到問題㗎！

（圖片來源：pinterest、tumblr）