【K韓公社】那些年我遇過的韓星—EXO篇

前兩日，韓國人氣男子組合EXO又黎香港開SHOW!一眾迷妹們又陷入左瘋狂狀態喇！

一睇到佢地，就諗起一段好樣衰既過往，講真又真係幾有緣㗎 (純個人感覺)。

想當年仲係年輕少艾一個，過住有返工無放工既灰姑娘生活。就喺某一日下午，我最不修邊幅，完全攰到唔想同人類溝通既時間，就聽到一眾同僚話有韓星黎拍野。我即刻冷靜回應:「嚇鬼咩！」，就頭也不回地去食個飯再補個眠先開工……

一食完野落反錄影廠，同事們都知我偽韓友一名，就即刻對我狂呼:「阿妹！真係韓星呀！叫EXO嘅一隊組合！成十幾個人㗎！你人生有幾可比仔圍呀！」(留意返因為個時EXO岩岩出道無耐仲係12個人，在下只知道呢個組合名，仲未知有咩人咩底細，請諒解～)個下個腦係「噹」一聲,因為本人呢刻同流浪漢無分別……而我既師兄們「懶」醒咁拎住一本雜誌係我面前話:「阿妹！我醒呀，拎左本野黎認人！」，我:「SUPER JUNIOR嚟……」「@_@?FXXK……」而個日都拍住個好可愛嘅導演，佢同我講:「我都好緊張呀!！咁陣間就交比你去溝通喇，如果有咩搵我話我唔係到！」仲下令要不停播放佢地首歌直到我地全部都熟哂為止！

而就係同事們同我爭論個EXO讀音點讀先岩既時候，個時小妹仲有眼不識泰山地咆哮:「EXO咪EXO囉！唔係E.X.O呀！是但啦！都唔紅！」