【湯水】化痰止咳！羅漢果西洋菜瘦肉湯

係街市見到啲靚靚西洋菜，又令我好想飲西洋菜湯，所以就買齊材料煲返一個化痰又止咳嘅羅漢果西洋菜瘦肉湯啦。

其實西洋菜湯除左好好飲之外，其實都好有益。西洋菜性涼，含植物性纖維和多種維他命另外，仲有清熱潤肺、助咽喉炎、氣管炎、肺結核、扁桃腺炎及百日咳等的功效。特別屬於燥熱性的咳嗽，療效更為明顯。(網上資料)

材料：

西洋菜約一斤、羅漢果半個、南北杏約兩湯匙、薑兩片及瘦肉約$40

做法：

1. 西洋菜先用鹽水浸佢一小時，中途最好換兩次水，因為西洋菜係水種植物，一定要洗乾淨啲啊！

2. 羅漢果壓碎與南北杏一齊洗淨；薑片拍鬆；瘦肉汆水

3. 煲內加入約3L水，然後加入薑片

4. 待水滾後加入所有材料，一定要大滾先好加人西洋菜，如果唔係煲出嚟嘅湯就帶點甘苦味

5. 繼續用大火加蓋煲約30分鐘

6. 之後轉慢火加蓋煲多1.5小時

7. 最後加鹽調味，就可以飲得，記得唔好浪費左啲西洋菜，因為煲過湯嘅西洋菜係超好食

羅漢果同西洋菜簡直係絕配，啖湯真係勁好飲，飲完喉嚨仲好舒服，真係十個正呀！(依個亦都係我鐘意煲西洋菜嘅原因…...哈哈哈)

溫馨提示：由於個人體質都有所不同，我啱飲時又未必每個人都啱，所以大家記得煲之前了解下自己，或者問下相熟中醫/藥材店職員，呢個湯料啱唔啱自己呀！