【澳門親子之旅】偽文青之選：井井三一繪本書屋

依家澳門真係越嚟越多親子消閒活動，除左一啲動態活動之外，當然就唔少得文靜一面，所以就帶小小豬嚟到依間開業一年多嘅井井三一繪本書屋，扮下偽文青吸收一下文化氣質啦！

其實我又點會咁叻搵到依個好地方，就係一次同魚子媽講開澳門親子活動，佢就介紹左依個正地方俾我。小小豬一向都好鐘意睇圖書，知道有依個好地方就當然好想嚟睇一轉，所以就係今次嘅澳門之旅加插依一個啱晒兩位老細嘅行程啦！

三三井一兒童繪本書屋就係位於澳門聖祿杞街31號，其實我都真係唔多識路，不過好在事前問左係澳門工作嘅舅父仔，我地搭巴士去到水坑尾站，然後開手機沿住GOOGLE MAP提供路線，行左大約十分鐘左右就到啦！

一嚟到小小豬就已經急不及待要入去啦。

整體上地方就唔算大，不過店內擺設整整齊齊，而且地下仲鋪著坐毯，整體感覺都好舒服呀。

佢個書架高度唔會太高，方便小朋友隨手拎繪本閱讀，完全感受到店主係以小朋友為先，真係相當貼心呢。

進入繪本閱讀區就需要脫鞋，所以衛生為由，大家記得要著襪呀。

小小豬就當然唔理咁多，揀好自己鐘意嘅繪本坐定定慢慢睇啦。

最令我欣賞嘅就係店主將部分書籍都以開放式咁擺放出嚟(大部分都係有趣嘅題材)，可以吸引小朋友嘅目光，從而鼓勵小朋友多閱讀嘛！

店內除左有適合唔同年紀嘅兒童繪本之外，仲有一啲係俾家長嘅親子教育書籍，同埋啱成年人嘅書籍，完全係大人同小朋友都可以照顧呀。

哈哈哈...…我家教育部部長都好專心，因為佢首要任務係幫小小豬搵啲合適嘅繪本。

當然我都有細心睇，當然都睇左好多兒童繪本，但最令我印象深刻嘅就係依兩本書，我絕對唔係有什麼歧視，只係覺得台灣繪本點解可以咁大膽，咁快就同小朋友談及如此大膽嘅話題。

另一系列我都好有印象，就係以第三者角式嚟面對死亡及受傷，我想小朋友睇完都可以明白更多(其實...…係我自己得到反思就真)。

估唔到一個小小嘅地方都可以逗留個幾鐘，如果唔係因為約左舅父仔食飯，我想小小豬都唔未打算走，因為佢話係度睇圖書好舒服~

當然...…我地就唔止嚟睇書，其實一早都打算買幾本俾小小豬(買圖書就係老公最樂意之事)。今次就買左小小豬都睇中左三本繪本，等佢返屋企慢慢睇啦。

三本繪本就用左$280，價錢唔算特別平，不過我覺得都係正常價。不過要提一提，付款係可以俾1:1港幣，不過店員只可以找回葡幣俾你，所以大家要留意啦。

其實都冇所謂，因為轉頭食晚餐可以用返葡幣俾錢嘛。

離開時店員仲送左啲九層塔種子俾小小豬，叫我地返屋佐試下種，可以為家帶多點綠色，真係好SWEET呀。

我覺得完全一間可以享受親子閱讀嘅書店，係我地逗留嘅時間內，完全可以話係自由活動，一啲購書嘅壓力都冇，而且店員都非常親切，感覺到她們唔係為賣書賺錢，而係想打造舒適親子閱讀空間。

其實井井三一繪本書屋仲會定時舉行繪本活動，當然我係香港就唔可以參加啦。不過係佢地FACEBOOK專頁(井井三一繪本書屋)留意下，因為佢地成日都會有好書推介，可以對繪本有更多認識嘛！