Facebook每一日都提住我哋同邊個邊個成為朋友幾耐，一時會有相，一時仲會自動整埋回憶片段。即使喺facebook度做咗朋友好多年，但結識年份同友情指數係咪有必然關係呢？
幾識交際、所謂朋友滿天下嘅人都好，當中都唔一定有明白自己內心嘅人。所以話識朋友不在乎數量，最重要嘅都係有幾交心。呢個時候，大家腦海係咪都已經浮現出一啲人名呢？不妨睇埋以下嘅友情等級，好好將諗起嘅人歸類啦！
1. 【真心指數：95％】
有時被佢鬧，有時被佢讚，只要佢哋喺身邊就覺得好安心
呢種朋友嘅存在就好似屋企人一樣，對你嘅每件事都咁關心，你做錯嘅話亦會毫不留情地責備你，呢啲其實都源自佢哋對自己嘅關心。更重要嘅係，佢哋亦會講出最真誠嘅意見，希望陪住彼此成長，行過人生唔同嘅階段。
2. 【真心指數：70％】
即使係單獨相處都可以暢所欲言，毫不尷尬
唔單止一班人一齊玩嘅時候有嘢講，就連剩返兩個人單獨相處都唔會欠缺話題，就算係講到差唔多停落嚟，彼此都唔會因為dead air而覺得尷尬。想講就講，無嘢講就停低，過程絕對唔會感到突兀。
3.【真心指數：50％】
間中會約出嚟傾偈，但唔一定會講到好深入嘅心事
大家久唔久就會約出嚟見面食吓飯、傾吓偈，講吓自己嘅近況係點，但深入啲嘅心事，好似價值觀嘅轉變、感情上面對嘅難題，或者對政治嘅睇法等就未必會講到。
4.【真心指數：40％】
酒肉朋友，飲食玩樂實有佢份
同酒肉朋友一齊飲飲食食、周圍玩，過程就梗係開心，你哋唔會話討厭對方，但亦唔係了解好多。玩樂以後，諗真啲發現其實都只係無養份嘅對話。
5. 【真心指數：25％】
互動只限於社交媒體上嘅likes同留言／Hi-bye friend
點頭之交，甚至係面都唔會見到嘅朋友，但有留意彼此嘅ig、facebook動態就屬於呢類。留意人都只係為咗窺探一吓對方日常嘅生活，僅此而已。
（圖片來源：tumblr）
