每個人對出軌嘅定義都唔同，有時可能只係喺酒吧中同人交換一個挑逗嘅眼神，或者同同事過從甚密，你又如何為「偷食」定立一條界線呢？據統計，當中25%嘅男人同15%嘅女人承認佢哋某程度上都試過出軌。如果你真係超越預期地出咗軌，你下一步就可能就十五十六緊，到底你應唔應該同對方坦白，講咗會唔會得到佢嘅原諒，定抑或係保守住呢個秘密呢？

問題係，到底一個女人係咪真係可以原諒到一個曾經背叛過佢嘅人呢？雖然唔會有1個標準答案係每段關係都啱用，但向伴侶坦承之前，你就要好好思考可能會出現嘅後果同點樣處理，一齊留意以下嘅5大要點！

1.反省問題所在

喺你同伴侶坦白一切前，好重要嘅係你要好好反省，思考係咩原因導致你出軌，會唔會係現有嘅關係出現咗咩問題，例如係溝通或生活模式，甚至未來嘅目標等。好好諗清楚問題所在，以及你喺呢件事汲取到咩教訓。有時候我哋都可能因為唔夠成熟而犯錯，但最重要係我哋會因此而成長，並且徹底改過，唔好再犯。

2.選擇一個安靜嘅時間同空間

如果你已經諗好決定坦白嘅話，跟住要留意嘅就係揀一個適合嘅時間同空間。喺安靜嘅環境下好好講返事情嘅來龍去脈，你亦要真誠地向對方認錯，講你反省咗啲咩，亦要畀對方時間接受呢個現實，好好安慰佢。

3. 注意點樣重建信任
如果你嘅女朋友願意原諒你，你需要明白要用一段長時間去重建返兩個人之間嘅信任。花多啲時間盡量好好同佢傾談，了解佢嘅諗法同需要，咁對你哋關係重回正軌好有幫助。

但要留意嘅係，曾經被一個人背叛嘅感覺係好難受嘅，而信任一但破裂，有時候就算你幾努力都好，都未必重建得到。

4. 留意伴侶係咪真係原諒緊你
即使伴侶口頭上話原諒咗你，但經歷咁大件事，內心肯定會有條刺。你要好好留意兩人相處時嘅細節，睇吓對方係咪真係慢慢原諒緊你，例如係佢嘅身體語言、同你講嘢嘅態度，甚至係你哋嘅性生活上都可以睇出端倪。

5.同對方一齊跨越呢個難關

當你選擇繼續努力維繫呢段關係，你就要清楚畀對方知道你有幾愛佢，唔單止係言語上，喺日常生活上亦要悉心照顧佢嘅需要，喺微小處上都令佢感受到你對佢嘅用心，明白佢喺你心目中絕對係佔有最重要嘅位置。

記住要用加倍嘅耐性照顧對方嘅需要，令佢相信兩個人之間嘅愛可以跨越難關，重拾對呢段關係嘅信心。

（圖片來源：buddhabarbie、tumblr）