欣宜變身潮肥妹 出席意大利fashion盛會

世界知名高級時裝店LuisaViaRoma今日開始（10日-12日）一連三日，於意大利佛羅倫斯舉行第10屆FIRENZE4EVER盛會，鄭欣宜（Joyce）將聯同香港人氣女王周秀娜（Chrissie）、內地歌手吳莫愁及韓國偶像BoA，以獲邀嘉賓身份出席盛會。是次盛會主題為「ORIENTAL OBSESSION 85年的時尚歷程──15年的網路開拓」。

從來時裝活動都是model天下，但今次時裝盛典卻邀肥妹仔Joyce成為亞洲代表之一，原因就是睇中Joyce肥得來開心積極，而且懂得打扮，以行動證明肥人都型得起。事實上，近一年的Joyce在形象上明顯有變，由過往casual打扮愈走愈型，近月她更以「8 look」拍了8條視頻，顯示其不同形象，有trendy型女、維多利亞淑女、牛女、運動look、及pink lady等，造型豐富，彰顯肥妹仔都可以型，玩百變都冇問題。

昨日Joyce和周秀娜已分別起程飛去意大利，Joyce表示對今次時裝之旅感到緊張又興奮，「我急不及待快啲去到，今次係第一次做有關時裝嘅工作。其實佢哋搵我時，我都好愕然，吓，你搵我？係咪搵錯人呀？因為諗起時裝，你會諗起一個好model身材嘅人，點會諗起一個肥妹仔？原來佢哋搵我係因為覺得肥妹點解唔可以着靚衫呢？肥妹都可以好trendy，肥妹都可以好stylish，都可以好有個人着衫風格。我知道LuisaViaRoma每一年都會搞兩次呢個FIRENZE4EVER活動，請晒世界各地嘅blogger去參加，今次有幾個blogger我平時自己都有follow，所以我一見到佢哋一定要集郵啦；同埋今次大會想推廣亞洲市場，所以就搵咗四個好唔一樣、各有範疇嘅亞洲女仔過去，有BoA、吳莫愁同周秀娜，仲有我。我哋去到後每一個人都要襯一個style lab，就係去到LuisaViaRoma嘅concept store入面，由二百幾個brand入面去襯三套自己鍾意嘅衫，我哋四個女仔都應該襯到好唔一樣嘅嘢出來，所以好期待。」

起行前，Joyce已透過LuisaViaRoma的網店選好活動戰衣，尤其挑選了很多Dolce & Gabbana的衣服；同時她為配合主題「ORIENTAL OBSESSION」，又揀了一些金色的衣飾，因為金色在中國傳統上可以代表lucky。

近一年Joyce簽了新經理人公司及唱片公司，加上比前長大，故她一直希望在形象及表達上有所改變，但卻遇上困難，「首先我肥咗好多，令到我喺香港好難買衫，於是迫於無奈喺網上買衫，但原來咁樣都好開心，因為choice多咗。其實初初都好辛苦，我哋做artist每一次出event都希望着唔同嘅衫俾大家睇，但係下下自己買就會好貴，初初諗有冇得借衫呢？又借到唔到喎，冇 size，人哋肯借我都着唔落，所以自己買囉。我成日覺得衫要着得靚，我諗有好多肥妹一個錯誤嘅諗法，我肥就要搵啲大size鬆身衫去遮，但我從來都唔覺得咁樣係一件好事，你要搵一啲 fit你、啱size嘅先係靚。」

至於周秀娜亦心情甚high，已在意國的她透露為此行已作好準備，她說：「準備好自己嘅心情啦，其實我準備咗啲衫過嚟，同埋我今次好開心被邀請，因為平時我都好鍾意上網買嘢，好鍾意 online shopping，同埋今次佢哋係旗艦店開幕，所以我除咗準備衫之外，另外我都準備咗個篋，希望將個篋裝到滿晒咁返去。」