大家都知墮入愛河係咩感覺啦！鍾意一個人嗰陣時，連個天都會藍啲、陽光溫暖啲、連頹飯都好食啲呀！不過，你都聽過「幻覺嚟㗎啫，嚇我唔到嘅！」㗎啦，要知道鍾意一個人嗰時，我哋嘅大腦其實都係分泌緊一啲新嘅荷爾蒙，咁樣我哋就會有開心、緊張、甚至有啲瘋狂嘅感覺呀！呢啲就嚟掩蓋咗理性嘅感覺，說到底，其實都係生理現象嚟！
（圖片來源：香港網絡大典）
其實當我哋面對鍾意嘅人，之所以會覺得有啲癲癲哋、傻傻哋嘅感覺，都係體內嘅荷爾蒙作怪咋！根據比薩大學教授 Donatella Marazziti 所講，根據研究，墮入愛河嘅人，腦內嘅血清素水平會比較低，而呢個水平係同強迫症患者一樣添！咁就解釋到，點解收到每一個message，你都會逼自己不斷解讀解讀解讀啦！不過唔使擔心，咁嘅情況其實唔會持續太耐！當你對佢嘅愛同關係越來越深，你個腦就會開始恢復正常！
另外，除咗感覺好瘋狂之外，鍾意一個人嗰時真係會令你暈哂大浪㗎！專門研究性嘅專家 Simone Bienne 就話，當你開始對人有好感，身體就會釋出好多化學物質，例如苯乙胺、多巴胺、催產素。呢啲物質會令你變得格外敏感，亦會有同人連成一體嘅慾望！
仲有呀！喺一段關係剛開始時，你總係覺得同對方見得唔夠！呢樣科學都可以解釋到㗎！心理學家 Deborah Khoshaba 就話，女性喺一段關係剛開始時，體內睪丸素就會上升，令到女性更有衝動、更加進取！而相反，呢個時候，男性嘅睪丸素就會下降，令到佢哋變得更加多愁善感同善解人意。而呢個咁奇妙嘅變化，就係令雙方變得一拍即合嘅重要元素喇！
而多巴胺亦都係一種非常重要嘅元素，令你想一星期7日，一日24小時都同對方一齊！生物人類學家 Helen Fisher 就話，多巴胺一旦被「激活」，喺你眼中就冇嘢緊要得過你嘅伴侶。而大腦為咗要得到更多多巴胺，就會令你想見到對方更多！事實上，見到愛侶時，大腦嘅反應係同吸咗可卡因一樣！
人生中總會遇到令你心動嘅對象。就算喺學校、公司、或者街上見到佢，都會令你心跳加速！究竟點解會咁大反應㗎？其實都係源於體內上升嘅催產素同皮質醇。催產素可以令人變得開心，而皮質醇就會令人感受到壓力。所以呢，下次見到暗戀對象，你會又開心又緊張，都係正常現象嚟㗎！而頭先提到嘅催產素，其實大有來頭！同我哋大有關係嘅愛情、性慾、愉悅、舒適......其實都同催產素有關！根據專家所講，大腦根本就係一個「製毒廠」，令你對愛人上癮呀！
不過，水能載舟，亦能...無錯，失戀時真係好慘呀！你感受到嘅孤獨同失落，同時又想同對方可以重新開始！呢個時候，你就會做出好多傻事！由於拍拖初期大腦會變得異常亢奮，一旦失去對方，大腦就會叫你做任何嘢，去填滿番失去嘅一塊。Deborah Khoshaba 話，呢個時候就最容易迷失自我！例如會瘋狂工作、將家庭放埋一邊等等。專家亦都話，喺拍拖初期有人會覺得心靈脆弱，尤其當你將自己原則放低去迎合對方時，就會令你失去安全感！呢個時候就會好容易發生戲劇性嘅事，令人面臨崩潰！
要避免受大腦影響做傻事？其實好簡單。第一，每個人都應該守住自己嘅原則，唔應該為對方過分扭曲自己價值觀。另外，要對自己好啲！食得健康啲、訓得夠、多做運動！當你焦慮時，一定要理性看待！例如點解對方成個鐘都未覆你？係...有機會佢已經對你厭倦，但會唔會更大機會佢忙緊呢？仲有，最重要就係，幾時都好，要做番自己。
（圖片取自Tumblr）
