啱啱同前度和平分手，唔多唔少習慣左有另一半嘅你，都會唔熟習回復單身嘅感覺，令自己有一絲想同前度復合嘅諗法。但一對情侶之所以分開，感情或者兩個人嘅目標應該都係出現左一啲距離。如果你無認真諗清楚就哀求對方同你再次喺埋一齊，最終可能呢段關係都係會無好結果收場。

認真考慮#1：點解上次大家會分手收場？

如果前度乞求你，或者係自己想同對方喺番埋一齊，第一樣需要考慮嘅就一定係點解上次你地會分手收場，反思二人之間究竟出現左乜野歧異。當你知道大家因乜野原因分開之後，你就要延伸諗下雙方喺分手之後有冇從錯誤中學習，或者大家喺分開之後有冇因此而改變，能夠再次配合對方。千祈唔好因為一時寂寞而草率下決定。

認真考慮#2：乜野條件會令你一定唔會復合？

因為回憶起同對方共度過嘅美好時光，你就會按著對方有嘅優點而美化左對方，希望自己能夠喺復合後再次同對方建構出愉快嘅經歷。向好嘅一面諗無錯係會好似正面一啲，但忽略左自己唔能夠接受嘅缺點卻會令對方有機可乘。此外，你亦都唔可以因為妒嫉而希望將已經開展新關係嘅前度搶番番嚟，因為你更應該認清嘅係究竟你面前呢個人值唔值得你再投放時間同感情落去。

認真考慮#3：乜野條件令你考慮同對方復合？

想同對方復合就要有全面考慮，而喺一般情況下，如果二人係因為Long Distance分開，復合成功率其實就會較高。之所以會有咁嘅結果，係因為Long Distance二人距離太遠，其中一方或者雙方就會較為無耐力去維繫一段有著距離嘅關係，最終就令兩人越走越遠，因距離而分開。所以如果大家分開嘅理由已經解決，而對方又有著值得你欣賞嘅條件，或者你就可以考慮復合。

認真考慮#4：需唔需要分開一段時間冷靜一下先？

如果係和平分手，或者你地仲會係以朋友身分聯絡。但如果你有復合嘅念頭，或者你就應該比一段真空期比自己，同對方分開一段時間冷靜頭腦再作打算。因為根據研究如果你好鐘意一個人，腦部最為活躍嘅部分其實就係發出上癮訊號嘅地方，所以你感覺愉快或者好似無左對方唔得咁其實都係腦部作怪，你需要冷靜一下先可以做出適合嘅決定，甚至係療傷。

認真考慮#5：復合後關係將如何進一步發展？

要建立一段新關係，首先你地都要學會寬恕、信任對方，有著重新出發發展關係嘅想法。寬恕指你要接受過去發生過嘅事情，而且仲唔會再因往事責怪對方。之所以能夠寬恕對方，你就同時需要信任對方，相信對方會堅守承諾，會同你一齊努力開展一段新關係。喺重新出發嘅路途上，你同另一半都需要互相扶持、照顧先可以堅定前進，所以寬恕、信任對方都係復合嘅首要條件。