又到聖誕節，諗到買咩畀另一半未先？如果仲未諗到，可以考慮今日上市嘅全新粉紅色Sony Xperia XZ，擺明車馬為女生而設。部機個機殼採用AKALEIDO高純度鋁合金材料製造，所以色澤用因應光線反射而略有轉變，望落相當有質感。

▼拍片時具備五軸防震功能。

雖然佢個設計及規格同之前嘅Xperia XZ完全一樣，但呢隻色屬於部分地區限定而非全球發售，建議零售價則同其他顏色一樣，售HK$5,698。
其實呢款機唔止隻色襯女仔，功能更加啱佢哋用，事關佢首創5軸防震拍片功能，重點係連前鏡頭都對應，貪靚嘅女仔咁鍾意自拍，都唔怕條片太震啦。

智能私人助理 Xperia Ear

買嘢畀女友，冇理由自己冇嘢落袋，嚟緊12月中旬至下旬，Sony仲會推出全新智能藍牙耳機Xperia Ear，見到佢個單聲道設計，就知唔係為聽歌用途，而係為忙到手機都冇時間拎上手嘅人而設。

部機內置雙向互動巧能，即係你講嘢落指令，佢畀反應讀出相關訊息，包括天氣、日程表、未接來電、電郵及社交apps文字內容等等，但要留意呢個功能暫時只對應英、法、日、意等外國語言，未支援中文。

▼耳機要放入專用充電盒內充電。

筆者覺得最正係對應體感操作，點頭或搖頭已代表「yes」或「no」，就算雙手唔得閒都可以作出回應，而且有來電嗰陣，戴上耳機就可直接聽電話，相反拎起手機又會自動駁去手機，唔似傳統藍牙耳機咁要手機轉換。

提提大家，唔一定用Sony手機，只要Android 4.4或以上嘅手機裝返個app就用得，不過iOS機就只支援一般來電對話功能。