同另一半相處左一段時間，或者你就會希望同佢更進一步，發展更為親密嘅關係。但喺採取下一步行動之前，你又知唔知對方究竟係唔係「處」呢？如果係嘅話又有冇啲乜野要特別留意，特別考慮清楚嘅呢？
1. 做足安全措施
就算對方係處女，但都唔代表你可以忽視安全措施，無視預防性病及避孕嘅方法。因此記得喺發生關係嘅時候，一定要戴套及做好避孕措施。
2. 如果彼此年齡差距太大，或者應該考慮放棄
雖然唔單止係年紀細先會仲係處，但如果你嘅另一半比你年紀細好多，咁你就一定要諗清諗楚，先可以同對方發生關係。因為有部分年紀細嘅女性會覺得，自己曾經同過年紀大嘅人發生關係就代表自己思想成熟，所以未免對方係一時衝動之後會後悔嘅話，大家都必須要睇清楚自己同另一半嘅關係先進一步發展落去，避免因受到慾望驅使而做出可能傷害到其他人嘅行為。
3. 記得要慢慢嚟
就算對方已經有晒心理準備，但由於生理條件所限，記得你都應該要慢慢嚟，等對方身體適應。性並唔係單憑想像就能夠預期嘅事物，因此喺發生性行為嘅時候都應該聆聽對方訴求，配合對方節奏。假如對方尷尬無講出口，但你睇得出佢係覺得唔舒服，你就一定要暫停了解清楚，避免只滿足自己而令另一半感到唔舒服。此外，亦都要注意對方此前並無性經驗，所以你地第一次嘅經歷未必係非常火辣，仲需要時間去慢慢調節。
4. 社會對於「處」有好唔同嘅睇法
對於處子之身，其實社會上對於兩性都有相當唔同嘅睇法，例如如果男性去到某個年齡層仲係處嘅話，佢地或者就會比人笑，但相反對於女性嚟講，身為處女卻代表左純潔，係一種大家都會尊重嘅美德。
所以假如你嘅對象係女性，而且你即將會同處女嘅佢發生關係，或者你可以事喺前同佢解釋清楚，自己唔係單純為左同處女發生關係先會同佢親熱，而係真心鐘意佢，咁或者你就會較為容易取得佢嘅信任同接納 。
5. 呢一刻可能對佢非常重要
之前曾經講過處子之身對於女性嚟講，係有額外意義，因此如果你嘅對象係女性，咁或者你就應該要明白呢一刻將會對佢係重要，所以必須清楚了解對方諗法，同佢解釋清楚。此外喺發生性行為期間，你都應該要額外留意對方感受，唔可以強人所難，只顧自己感受，而漠視對方可能存有嘅恐懼感覺。
6. 講出自己預期嘅狀況
你地兩個究竟係唔係一齊左好耐呢？你覺得發生關係之後，二人感情狀況會唔會繼續落去呢？而且會唔會係維持現狀呢？以上種種問題，你都應該要同另一半檢視清楚，避免大家根本想法唔同，日後因誤解更難相處。
7. 事後記得要關心對方
無論關係本身係唔係已經非常牢固，記得喺發生關係之後，你第一時間都應該要關心對方感受，確認對方無因此而感到不妥。除左係完事一刻要注意對方之外，接下來都應該要確保對方無任何特別疑慮，比對方知道自己隨時都會支持佢，喺佢身邊。
8. 除左另一半之外，都要確保自己感覺一切正常
無錯對方係需要你嘅關心，但同一時間你都唔可以唔記得照顧自己感受，例如唔好因為對方壓力而突然決定要同對方發生關係。此外，就算對方幾信任你，自己都應該要有底線，並且要同對方講清楚，唔好所有野都遷就晒對方。
