「大話講3次就係真」？呢個講法好似好無科學根據，信唔信得過架？但原來就住呢句說話去研究，英國一間大學又真係證明到一個人經常講大話，又真係會愈講愈叻，更容易令人信服你嘅謊言！唔怪得咁多政客比人揭穿講咁多大話，最後都係仲有人會信啦！
為了研究人類對於講大話時嘅反應，倫敦大學就曾經邀請左80人接受研究，觀察佢地腦部喺講大話時嘅活動。無論接受研究者是男是女，佢地都會劃一收到一個裝有散銀嘅玻璃罐，並且需要向身邊拍檔講大話，呃佢入面裝有錢嘅真實金額。
▼研究指出，大話原來真係會越講越順，呃人之餘更呃埋自己。
研究發現當人第一次講大話嘅時候，腦入面嘅杏仁核就會啟動，即係腦裏面處理情感嘅部分就會較為活躍，令人為謊話感受到罪疚感。但喺接受研究嘅人重覆不斷為罐入面嘅錢講大話之後，腦部需要啟動杏仁核嘅次數就越嚟越少，結果就會令人愈講愈順，就好似連自己都呃埋咁。
更令人意外嘅係如果大話係涉及自身利益，杏仁核所啟動嘅次數更加係少之又少，令人嘅腦部懂得為左自己嘅利益調節，熟習左講大話呢個做法，懂得熟練咁欺騙其他人。
但同一時間研究亦都顯示腦部出現咁嘅情況，係會有機會令人做事更加魯莽，或者會存有暴力傾向。所以總括嚟講，真係唔好講咁多大話，因為對健康真係唔係幾好囉！
