女人比男人喊得多，而且分顏色比男人分得更加仔細？無錯，好多人心裡面都會有著呢啲先入為主嘅諗法，但究竟咁諗係屬於單純以偏概全，定其實真係有根有據嘅呢？

原來根據外國多項研究，唔少我地經常講笑嘅女性專屬特質，其實真係有科學實證確實存在！例如以下呢15項，大家應該都聽過無數次掛？

1. 睇到更多顏色

大家應該都試過同女朋友行街Shopping時，見佢鐘意粉紅色就拎起個粉紅色嘅銀包比佢鑑賞一下，點知最後換嚟嘅，竟然係嬲嬲豬話唔係呢隻色... 下..？唔係都就係粉紅色咋咩？原來根據馬里蘭州大學研究，擁有X染色體嘅就能夠更為清楚地睇到紅色，所以係能夠清晰分辨紅、藍、綠三色之下，女性睇顏色就會有更大優勢，比男性更懂得細分顏色，對顏色更為敏感。

2. 氣味分得更為細緻

堆衫放左喺廁所幾日等一次過洗，但女朋友上到嚟就大叫好臭好污糟... 明明我自己真係唔覺有味喎... 係我有問題定佢視覺覺得污糟，就聯想到係臭呢？雖然女士同男士個鼻嘅構造係無任何分別，但原來喺分析氣味之上，女性會用更多腦細胞去解讀吸入嘅氣味。而之所以女性會有咁嘅特殊能力，全因女性潛意識上都會用氣味分辨男性係唔係佢地理想對象，以憑著氣味分析對方身體釋放嘅化學物質。

3. 情感上較為執著

好多人都應該曾經試過比女朋友鬧份人唔夠著緊，事實上男人份人又真係無咁執著，較為隨心所欲一啲。格里菲斯大學研究指出，女性喺一段關係入面，真係較男性關心自己另一半，而且更會顯示出更大同情心，所以女士真係喺情感上較為執著架！

4. 能一心多用

赫特福德大學一項2010年嘅研究指出，相較男性，女性其實更擅長同一時間處理三項或以上工作，而是所以有著如此神奇嘅技能，全因女性通常會先思考後動手解決面前狀況，因此就能夠好好分配工作同時處理。

5. 較衛生

聖地亞哥及亞利桑那州大學嘅研究都顯示喺辦公室當中，男性嘅座位比女性嘅明顯有著更多細菌，所以明顯女性喺個人衛生方面係較大部分男士高要求。

6. 對疼痛較為敏感

由於女性較為缺乏一種名為GIRK2嘅蛋白質，因此喺絕大部分情況下，女性就會較為難以忍耐疼痛感覺，比男性較為敏感。

7. 無咁風趣

雖然荷里活有著唔少女性喜劇明星，但原來根據加州大學一項研究要求，女性志願者所撰寫嘅有趣描述係較男性嘅乏味，而男性所撰寫嘅則普遍較為風趣幽默。

8. 較易飲醉

由於女性身體裡面水分比男性少，因此喺攝入酒精之後，女性身體裡面能夠中和酒精嘅水分都會較少，所以就會容易飲醉。此外因為女性同時較為缺乏肝酶，所以亦都較難化解酒精，較男性快飲醉。

9. 較為健談

「三個女人一個墟」呢個講法原來亦都係有根有據，因為根據Brizendine博士嘅一項研究，女性平均講嘅字詞就比男性平均嘅13,000個，多出7000個！之所以會有咁嘅現象，全因女性體內含有較多蛋白質Foxp2，所以就會令佢地腦部掌控語言嘅區域比男性大17%。

10. 駕駛技術較遜色

成日都聽人講女士手車多數麻麻，都會抱有懷疑態度，但根據倫敦大學一項研究，女性跟同志男性手車原來都較為遜色，因為佢地嘅導航技巧、方向及空間感都較差。所以一旦去到新地方，女性同同志男性駕駛者都會較為徬徨。

11. 較為煽情

女性喺大部分情況下，都會較為容易表露心中情緒，比人感覺較為煽情。而根據蒙特利爾大學研究，女性喺觀察富有強烈情感嘅圖片時候，佢地會較為激動顯示出當時感受到嘅情緒。之所以會有咁嘅狀況，原來係因為女性腦袋裡面主宰情感嘅部分結構係較為緊密，因此就會比男性更為受到情感牽引。

12. 無咁多性幻想

俄亥俄州大學表示喺18至25歲嘅男女當中，男性係會較女性多有性幻想，指出男性喺一小時裡面就會有最少有兩次類似嘅諗法，而相反女士則只會有大約一次，顯示女性比男性嘅性幻想頻率低。

13. 性需求其實同男士一樣

雖然女性比男性較少有性幻想，但其實對於性方面嘅需求卻同男士相差無幾，反而仲會因為社會比佢地嘅壓力而需要抑壓自己慾望。例如喺一項調查當中，500名接受研究嘅女士當中就有75%表達自己好像一星期有3次性行為，所以女性其實並唔係性冷感架！

14. 胸部大小不對稱

有人會以為女性胸部應該係兩邊都一樣，但其實喺實際情況下，女性左右胸嘅大小都絕對唔會係一樣，總會有一邊係大啲。

15. 食物同性一樣都為佢地帶來快感

原來對於女性嚟講，見到自己喜愛嘅食物同性一樣，都會為佢地帶來同樣快感。之所以有著咁嘅情感，係因為女性腦內感受到性快感嘅部位都同時主宰左佢地對喜愛食物嘅感受，所以食物同性都能夠為佢地帶來同樣快感。