當講到偷食呢個話題，好多人都會認為有肉體上嘅親密接觸先至係出軌。但實際上對於出軌嘅真正定義，其實除左肉體親密接觸之外，對第三者作出過分感情投放都係代表對自己嘅另一半不忠。

咁究竟乜野嘅行為就足以被訂定為伴侶出軌呢？或者睇清楚以下9個對於出軌嘅誤解之後，大家就會更加容易分辨自己究竟係過分敏感，定抑或是伴侶真係喺你背後偷食緊！

1. 其中一方出軌之後，雙方就從此唔再快樂？

當一段關係因為其中一方出軌而出現問題，好多人都會認為伴侶關係就會從此結束，雙方亦會因此而不再快樂。但其實實際情況下亦並不缺乏成功修補關係嘅例子，部分更加會因為事件而變得更加了解另一半的需要，修改關係存有的缺點，從而避免再次出現出軌行為。

2. 同第三者發生親密行為，係因為感情出現問題？

一有肉體上親密接觸，就必定等於一段關係出現感情問題？咁又未必，因為部分人出去偷食，同第三者有肉體上有親密接觸，其實歸根究柢只不過係另一半喺生理上滿足唔到佢而並非全與感情有關。當然雖然偷食者會咁樣諗，但另一半接唔接受解釋就另一回事，因為唔少人都相信另一半同第三者發生親密行為，就已經可以被判「死刑」。

3. 無肉體上接觸就唔代表出軌？

如果另一半偷偷等你瞓左之後，Whatsapp第三者同佢講啲連你都唔清楚嘅私事，你會唔會覺得對方係出賣緊自己，係偷食嘅行為之一呢？雖然另一半咁做純屬可能係想同人訴苦，但其實某程度上將私密感情投放於第三者身上，而無視身邊最親密嘅人，咁都代表左佢將會有出軌嘅意圖，並非完全無辜。

4. 有肉體上接觸先至等於出軌？

跟前述一樣好多時候被定義為出軌嘅情況，其實更多係因為感情上出現左第三者，令關係中其中一方被冷落，心理上無法同伴侶聯繫。所以相比因親密接觸而出軌，更多人會係因為將感情轉為投放喺第二個人身上而出事。

5. 出軌對象一定係比伴侶年輕？

唔少電視劇、電影情節都會描寫第三者形象成比伴侶年輕、有錢、好樣，但其實現實中卻並唔係絕對有咁嘅情況。

6. 出軌係因為婚姻出現問題？

坦白講無一段婚姻係絕對完美、零瑕疵嘅，更重要嘅係雙方喺出現問題之後，要識得互相理解化解問題，而並非令事情不斷擴大至無法修補的階段。因此出現出軌嘅情況並非單純因為婚姻出現問題，而係雙方無盡力去面對同解決困局。

7. 出軌＝離婚？

出軌就注定雙方需要離婚？原來根據研究，出軌未必係單一造成離婚嘅原因，而係雙方喺出現出軌情況之前，關係就已經出現並無處理嘅問題。因此部分伴侶喺出現出軌情況後，反而會令大家更為明白對方，以及共同解決問題，最後仲會讓關係重回正軌添！

8. 出軌得一次，注定有第二次？

出軌一次之後係唔係就代表對方必定會有第二次，從此永不翻身呢？呢層都係未必嘅，但當然世界上又真係有好多咁離譜嘅人。正面啲去諗有部分人其實真係會因為出軌一次之後，發現自己真係做錯左而從今改過自新，而並非個個都係重複犯錯嘅衰人嚟。

9. 出軌多數都係精心策畫嘅？

非也，出軌嘅行為好大部分時間都係無意間發生，由一個人適應左同另一個人做朋友，之後感情上開始越嚟越親密，到及後發展到取代左身邊原有伴侶。