仲有幾日就已經係萬聖節，唔知你地有冇計畫點樣慶祝，會去邊度玩下咁呢？萬聖節貴為西方人嘅鬼節，其實你唔覺得相比開Party，去探靈係會更有氣氛咩？！
除左我地本地一啲較知名嘅靈異景點之外，其實歐洲以及東南亞嗰邊仲有啲更加猛嘅地點比大家開展禁忌之旅。如果你對靈異嘢特別有興趣嘅話，以下呢19個詭秘聖地你就一定要去，記得事前要做好準備呀！
1. 秘魯：Chauchilla古陵園（Chauchilla Cemetery）
位處於Sechura沙漠心臟地帶，Chauchilla古陵園最詭秘之處係人骨隨處可見。而根據歷史資料，墓園所載有嘅骸骨最古老能夠追溯至公元1000年，係屬於古代嘅埋葬場所。
2. 葡萄牙：人骨禮拜堂（Capela dos Ossos）
人骨禮拜堂一如其名，係由最少逾5000位修士嘅骸骨建造而成。除此以外，呢座建於17世紀嘅天主教聖方濟天主堂更加有著兩副完整骸骨，分別係一名成年人，以及小孩骸骨懸掛喺牆上面，非常恐怖。
3. 捷克：塞德萊茨藏骨堂（Kostnice v Sedlci）
同葡萄牙人骨禮拜堂差唔多，捷克塞德萊茨藏骨堂都係一所收藏左大量人骨作為裝飾嘅教堂，估計骨頭來自約40,000人，數目相當膨大。
4. 捷克：聖喬治教堂（St. George’s Church）
捷克聖喬治教堂喺1968年嘅時候，天花就曾經喺一個喪禮中突然倒塌。而一位藝術家喺加入左佢創作嘅石膏人像之後，教堂氣氛就顯得更為神秘，令人不寒而慄。
5. 美國：羅克蘭廢棄精神病中心兒童病房（Rockland Psychiatric Center）
講左咁多有人骨嘅恐怖景點，唔好以為精神病中心無人體遺骸就唔會恐怖！根據資料數字，建於30年代嘅羅克蘭廢棄精神病中心最高峰嘅時候就曾經接受過9000名病人，更加聽聞遺址一直都有鬧鬼傳聞。
6. 菲律賓：薩加達懸垂棺材（Hanging Coffins of Sagada）
同中國丘北縣白泥塘嘅懸垂棺材差唔多，菲律賓伊戈羅特部落有以懸垂棺材紀念先人嘅習俗，據說可以拉近族民同祖先嘅距離。
7. 意大利：嘉布遣地下墓穴（Catacombe dei Cappuccini）
除左有大量能夠追溯到16世紀嘅木乃伊之外，意大利嘉布遣地下墓穴更曾經喺1982年發現過一具保存極度良好嘅小女孩遺體，猶如佢只不過係瞓著左覺一樣。
8. 烏克蘭：普里皮亞季（Pripyat）
烏克蘭普里皮亞季可能你未必聽過，但切爾諾貝爾核電廠你就一定非常熟悉。經過核事故之後，普里皮亞季就已經被廢棄，但到現在呢一刻當地都依然保持住86年時當地居民緊急疏散嘅可怖面貌，彷彿好似時間喺普里皮亞季停頓左一樣。
9. 德國：貝利茨Heilstätten軍用醫院（Beelitz-Heilstätten Military Hospital）
建於1898年，德國貝利茨Heilstätten軍用醫院以前係用嚟醫治肺結核病人，而且更加曾經醫治過希特拉，但宜家已經人去樓空。
10. 墨西哥：瓜納華托州El Museo de las Momias
喺墨西哥瓜納華托州El Museo de las Momias裡面，存放在大量於1833年霍亂大爆發時身亡嘅人嘅木乃伊。當中，一個嬰孩嘅木乃伊則最為聞名。
11. 布拉格：老猶太公墓（Starý židovský hřbitov）
根據統計，布拉格老猶太公墓能夠追溯至1478年，而且埋葬嘅遺骸多達12層，估計最少埋葬左100,000人。雖然遺骸數目眾多，但該處嘅墓碑就只有12,000個。
12. 多哥：巫術市場（Akodessewa Fetish Market）
西非多哥共和國有著一個神秘嘅巫術市場，專門售賣於巫術有關嘅用品，能夠搵到大量動物，甚至係人體遺骸。據說呢啲古怪嘅商品係有神秘功效，能幫助巫師醫治疾病。
13. 日本：青木原自殺之森（青木ヶ原）
因為交通便利而且相當隱蔽，青木原嘅樹海長期都係日本知名嘅自殺聖地。單從1950年代起，呢度就最少有500人消失於叢林之中。
14. 立陶宛：十字架山（Kryžių kalnas）
據統計立陶宛十字架山上面就喺逾百年裡，就有著多達100,000個十字架建於山上，祈求上主能夠施行神蹟。
15. 納米比亞：卡曼斯科（Kolmanskop）
位處於納米布沙漠中嘅卡曼斯科喺1940年代就因鑽石價格低落，採礦業衰弱而令當地人遷出。如今卡曼斯科就只剩下沙粒同廢棄房屋，係一座無人居住嘅鬼鎮。
16. 美國：西維珍尼亞州監獄（West Virginia State Penitentiary）
西維珍尼亞州監獄呢一個廁格，曾經執行過逾100次死刑直至1995年為止。目前，呢個廁所就已經開放左比遊客參觀。
17. 蘇格蘭：歐沃頓橋（Overtoun Bridge）
蘇格蘭歐沃頓橋詭異之處，在於佢喺70年間就已經有600隻狗喺不明狀況下離奇跳橋，當中更有50隻命喪當地，非常靈異。
18. 英國：紅沙海堡壘（The Red Sands sea forts）
位處於英國肯特郡嘅 紅沙海堡壘，原意係用嚟對抗二戰德軍入侵，保護英國國土。但喺1956年，堡壘就已經荒廢。
19. 巴西：蛇島（Snake Island）
巴西蛇島睇上去好似同其他島無咩分別，但其實佢每平方米就會最少有一條毒蛇出沒。根據流傳，島上居民就係因為毒蛇而滅絕，因此蛇島就被認定為不適宜人類居住。
