你地仲記唔記得自己同另一半，當初究竟係邊一個首先講「我愛你」嘅呢？係唔係印象當中，多數都係你做主動個一方呢？其實呢個情況真係絕不罕見，而且更加係有根有據架添！但究竟點解男性首先講「我愛你」嘅機會係高過女性嘅呢？或者以下嘅研究數據就能解開你嘅疑惑，以及令你懂得喺更適當嘅時機講出「我愛你」呢！
▼ 點解我地會怕做第一個講「我愛你」？▼
喺每一段關係當中，總需要其中一方鼓起勇氣同對方講出「我愛你」，但其實雙方喺思量如何講出嚟嘅時候，都會感到非常恐懼。根據奧斯汀德克薩斯大學心理學學家研究，由於大家都會擔心無法得到自己心儀對象嘅答覆，因此呢種感覺就會令人非常抗拒首先講出「我愛你」。
▼ 兩性邊個講「我愛你」先？▼
根據里斯堡賓夕凡尼亞州立大學喺《今日心理學》發表嘅研究，喺異性戀嘅關係之中，男性係較多為首先講出「我愛你」嘅一方，部分更會喺只拍拖幾星期後就會同對象講「我愛你」，似乎比女性較容易講出口。
▼ 為何男性會較為心急？▼
1. 為左性
女性會比男性較耐先講「我愛你」，主要原因係因為佢地需要用更多時間評估男性係唔係值得成為自己另一半。相反男生之所以咁主動搶先講出「我愛你」，其中一個目的則係想提高同女方親熱嘅機會。
而且密歇根大學所進行研究嘅更加顯示，雖然男士經常都會喺同女方第一次發生性行為之前講「我愛你」，想要得到女性信任，但其實對於女性嚟講咁嘅做法就只係50/50，因為有唔少女性都能夠一眼看穿異性意圖，以及更加喜歡喺發生性行為後先聽到另一半講「我愛你」。
2. 認為男性應該做主導
除左係因為對性嘅渴求之外，男性會首先講出「我愛你」嘅另一個原因，有機會係認為男性喺一段關係內，傳統上都應該採取主導，就好似男性應該主動追求女性一樣。
